“AZBADAM” MMC 2017-ci ilin Fevral ayından başlayaraq 3 il ərzində 470 hektar intensiv üsulla əkin aparılmış badam bağlarının salınmasını işini öhdəsinə götürmüşdür.

Şirkətdən Marja-ya verilən məlumata görə, bu badam bağlarında əkilən badam növləri İspan sortları kimi tanınan “Guara”, “Belona”, “Soleta”, “Avjior” sortlarıdır. Hər hektara 2,5-3 ton badam ləpəsi verə bilən bu ağaclar Abşeron mikro iqliminin xüsusiyyətlərinə tam uyğun olmaqla yanaşı, xəstəliklərə qarşı dözümlülükləri ilə seçilirlər.

Əkin prosesi ilə eyni zamanda “AZBADAM” MMC tərəfindən badamın son məhsul kimi ləpə formasında emalını nəzərdə tutan Badam Emalı zavodunun işə salınması planlaşdırılır. Bu ilin Noyabr ayında istifadəyə verilməsi nəzərdə tutulan, ən müasir avadanlıqlarla təchiz olunacaq və Cənubi Qafqaz regionunda bir ilk olacaq Badam Emalı zavodunun tikintisinə artıq start verilmişdir.

İllik 750-800 ton badam ləpəsi emal etməyə imkan verən bu Zavod Ölkəmizi tam şəkildə yerli badam ləpəsi ilə təmin etməyə, bu istiqamətdə idxaldan asılılığı əsaslı şəkildə azaltmağa və yeni məhsul kimi Azərbaycan badamının ixracına imkan verir.

Texniki proseslərdə yüksək standartların tətbiqinə böyük əhəmiyyət verməklə yanaşı “AZBADAM” şirkəti kadr resurslarının da əvəzolunmaz önəmini diqqətində saxlayır. Hal-hazırda 170 nəfər əməkdaşı olan Şirkətdə Zavodun fəaliyyətə başlamasından sonra əlavə 35-40 yeni iş yerinin də açılması nəzərdə tutulur.

Azərbaycanda qeyri-neft sektorunun inkişaf etdirilməsi ilə bağlı həyata keçirilən tədbirlər çərçivəsində badamçılığın inkişaf etdirilməsi kənd təsərrüfatının prioritet istiqamətlərindən biri kimi müəyyən edilmişdir. Badamçılıq təsərrüfatının dünya standartlarına uyğun şəkildə təşkil edilməsinin əsas məqsədi bu sahənin dayanıqlı əsaslarla inkişafına nail olmaq, badam emalı sənayesinin xammal təminatını yüksəltmək, istehsal edilən məhsulun keyfiyyətini və həcmini artırmaq, bu sahədə fəaliyyət göstərən digər təsərrüfat subyektlərinə də dəstək olmaq, badamın  ixrac potensialını gücləndirmək və məşğulluğu artırmaqdan ibarətdir.