“Müvəqqəti inzibatçının təyin edildiyi AGBank və NBC Bankda da vəziyyət ürəkaçan deyil, digər banklardakından (AtaBAnk və Amrahbank) fərqli deyil”.

Marja xəbər verir ki, bunu Mərkəzi Bankın sədri Elman Rüstəmov bildirib.

Elman Rüstəmov qeyd edib ki, AGBankın (Azəriqazbankın) normal fəaliyyəti üçün 195 milyon manat, NBC Bankın normal fəaliyyəti üçün 73 milyon manat tələb olunur:

“Banklar üçün minimal kapital tələbi 50 milyon manatdır. Yəni fəaliyyətdə olan bankdırsa ən azı 50 milyon manat kapitalı olmalıdır. Bu gün AGBankın kapitalı mənfi 145 milyon manatdır. 50 milyon manat minimal tələbi də nəzərə alsaq bu Bankın normal fəaliyyəti üçün 195 milyon manat tələb olunur.  NBC Bank-ın kapitalı 23 milyon manat minusdur. Yəni 50 milyon manat plyus əvəzinə minus 23 milyondur. NBC Bankın normal fəaliyyəti üçün 73 milyon manat vəsait tələb olunur. AGBankda problemli kreditlər 54%-dir. NBC Bank üzrə isə 32%-dir. Likvidlikləri də çox aşağı səviyyədədir”,- Mərkəzi Bankın sədri bildirib.

Elman Rüstəmov bildirib ki, lisenziyaları ləğv edilmiş AtaBank və AmrahBankda vəziyyət daha ağır olub:

“AtaBank-da kapital minus 214 milyon manatdır. Əgər fəaliyyətdə olan banklar üçün 50 milyon manat kapital tələbini də üzərinə gəlsək AtaBankın normal fəaliyyəti üçün 264 milyon manat vəsait tələb olunur. Bu bank tam şəkildə maliyyə dayanıqlığını itirmişdir, verdiyi kreditlərin 88%-i problemli kreditlərdir. Bank tam şəkildə likvidliyini itirib, əhalinin əmanətlərini və biznesin vəsaitlərini qaytara bilmir. Olduqca acınacaqlı vəziyyətdir. Bu bankın xilas olunması və sağlamlaşdırılması üçün heç bir imkan yoxdur.

Keçək Amrahbanka. Bu bank maliyyə hesabatlarında özünü normal bir bank kimi təqdim edirdi. AmrahBankın kapitalı mənfi 77 milyon manatdır. Bankın normal fəaliyyəti üçün 127 milyon manat kapital lazımdır.  Bu bank ilə çox ciddi söhbətimiz oldu. Reallıqlar bankın sahiblərinin diqqətinə çatdırıldı, onlara kapitallaşma planları təqdim etmələri üçün vaxt verildi. Əmanətçilərin pullarının xilas olunması birinci onların borcu idi. Onların belə bir imkanları olmadı, plan təqdim etməkdən imtina etdilər və biz məcbur olduq lisenziyanı geriyə çağırdıq. Amrahbankın müştərilərə verdiyi kreditlərin 40%-i problemlidir. Bu o deməkdir ki, onların geri ödənilməsində problemlər var.

Real vəziyyət bundan ibarətdir. Bu banklarda (AtaBank və Amrahbank) əhəmiyyətli əmanət qalığı var, 400 milyon manatadək əmanət var. Biz bu əmanətləri xilas etməliyik və əmanətçilər bu vəsaitləri geri almalıdırlar”.