“Rabitəbank” ASC 2019-cu ilin 1-ci rübünü 1 milyon 129 min manat xalis mənfəət ilə başa vurub. Bu, ötən ilin eyni dövrü ilə müqayisədə 2 milyon 130 min manat və ya 65,4% azdır. Belə ki, Bank 2019-cu ilin 1-ci rübündə 3 milyon 258 min manat xalis mənfəət əldə etmişdi. Xalis mənfəətin azalması ehtiyata ayırma ilə bağlıdır. İlk rübdə Bankın biznesi genişlənib, gəlirləri və əməliyyat mənfəəti artıb.

Marja Bankın maliyyə göstəricilərinə istinadən xəbər verir ki, 2020-ci ilin yanvar-mart dövründə Rabitəbankın cəmi əməliyyat gəlirləri 14 milyon 741 min manat, cəmi əməliyyat xərcləri isə 10 milyon 491 min manat təşkil edib. Gəlirlər xərcləri üstələdiyindən Bankın 4 milyon 250 min manat əməliyyat mənfəəti yaranıb. Bank əməliyyat mənfəətinin 3 milyon 120 min manatını mümkün zərərlər üçün yaradılan məqsədli ehtiyatlara ayırdığından ilk rübü 1 milyon 129 min manat xalis mənfəət ilə bağlayıb.

Müqayisə üçün qeyd edək ki, 2019-cu ilin 1-cü rübündə Rabitəbankın cəmi əməliyyat gəlirləri 12 milyon 157 min manat, cəmi əməliyyat xərcləri 8 milyon 884 min manat, əməliyyat mənfəəti 3 milyon 273 min manat təşkil etmişdi. Bank mümkün zərərlər üçün yaradılan məqsədli ehtiyatlara cəmi 14 min manat ayırdığından xalis mənfəəti 3 milyon 258 min manat olmuşdu.

GƏLİRLƏRİ ARTIB

Rabitəbankın faiz gəlirləri ötən ilin ik rübündə 10 milyon 75 min manat ikən, 2019-cu ilin ilk rübündə 11 milyon 475 min manat təşkil edib. Qeyri-faiz gəlirləri isə 2 milyon 82 min manatdan 3 milyon 266 min manata yüksəlib. Gəlirlərin artması ilə əlaqədar olaraq Rabitəbankın əməliyyat mənfəəti təxminən 30% artaraq 3 milyon 273 min manatdan 4 milyon 250 min manata yüksəlib.

KREDİT PORTFELİ BÖYÜYÜB

Rabitəbankın müştərilərə verdiyi kreditlər 2019-cu ilin sonu ilə müqayisədə 11 milyon 312 min manat və ya 3% artaraq 388 milyon 250 min manata çatıb. Artım istehlak kreditlərinin hesabınadır. Belə ki, 2020-ci ilin ilk rübündə istehlak kreditləri 52 milyon 513 min manat artaraq 154 milyon 36 min manata çatıb, biznes kreditləri isə 46 milyon 294 min manat azalaraq 160 milyon 479 min manata düşüb. Daşınmaz əmlak kreditləri də 2 milyon 997 min manat artaraq 38milyon 77 min manata yüksəlib.

31 Mart 2020-ci il tarixində Rabitəbank 104 milyon 846 min manat məcmu kapitala malik olub.