“AccessBank” QSC 2020-ci ilin 1-ci rübünü 2 milyon 475 min manat xalis mənfəət ilə başa vurub. Halbuki, Bank ötən ilin ilk rübünü 74 milyon 600 min manat zərər ilə bağlamışdı.

Marja Bankın maliyyə göstəricilərinə istinadən xəbər verir ki, 2020-ci ilin yanvar-mart dövründə AcessBank-ın cəmi əməliyyat gəlirləri 28 milyon 324 min manat, cəmi əməliyyat xərcləri isə 26 milyon 743 min manat təşkil edib. Gəlirlər xərcləri üstələdiyindən Bankın 1 milyon 581 min manat əməliyyat mənfəəti yaranıb. Eyni zamanda, mümkün zərərlər üçün yaradılan məqsədli ehtiyatlardan azad olmuş 894 min manat mənfəətə əlavə edilib. Beləliklə, Bank ilk rübü 2 milyon 475 min manat xalis mənfəət ilə bağlayıb.

Müqayisə üçün qeyd edək ki, 2019-cu ilin ilk rübündə “AccessBank”ın cəmi əməliyyat gəlirləri 45 milyon 357 min manat, cəmi əməliyyat xərcləri 28 milyon 18 min manat, əməliyyat mənfəəti 17 milyon 339 min manat təşkil etmişdi. Bank mümkün zərərlər üçün yaradılan məqsədli ehtiyatlara 91 milyon 939 min manat ayırdığından əməliyyat mənfəəti silinmiş və həmin rübü 74 milyon 600 min manat zərər ilə bağlamışdı.

FAİZ GƏLİRLƏRİ ARTIB

AccessBank-ın 2019-cu ilin ilk rübündə faiz gəlirləri 22 milyon 969 min manat ikən, 2020-ci ilin ilk rübündə 25 milyon 984 min manat təşkil edib (3 milyon 15 min manat və ya 13,1% artıb). Bankın qeyri-faiz gəlirləri isə 22 milyon 388 min manatdan 2 milyon 340 min manata geriləyib. Qeyd edək ki, ötən il qeyri-faiz gəlirlərinin yüksək olması birdəfəlik “digər gəlirlər” ilə bağlı idi.

Faiz xərclərinin azalması ilə əlaqədar olaraq AccessBank-ın cəmi xərcləri də azalıb.

BANKIN BÖYÜKLÜYÜ 900 MİLYON MANATA YAXINDIR

31 Mart 2020-ci il tarixində AccessBank  895 milyon 341 min manat cəmi aktivlərə malik olub və aktivlərin 604 milyon 53 min manatını müştərilərə verilən kreditlər təşkil edib. Ötən ilin sonu ilə müqayisədə müştərilərə verilən kreditlər 6 milyon 905 min manat və ya 1,1% azalıb.

İlk 3 ayda Bankın depozit portfeli 72 milyon 609 min manat və ya 11% azalaraq 588 milyon 351 min manata düşüb.

31 Mart 2020-ci il tarixində AcessBank 79 milyon 451 min manat məcmu kapitala malik olub.

ƏN BÖYÜK PAY ASİYA İNKİŞAF BANKINA MƏXSUSDUR

Ötən ilin Mart ayında AccessBank nizamnamə kapitalının 118,5 milyon manat məbləğində artırılmasının başa çatdığını elan edib. Kapitallaşma prosesi yeni səhmdarlara və bankın təsisçi - səhmdarı olan Beynəlxalq Maliyyə Korporasiyasına (IFC) yeni səhmlərin emissiyası, o cümlədən mövcud səhmlərin yeni səhmdarlar arasında bölüşdürülməsini əhatə edib. Yeni səhmdarlar arasında Asiya İnkişaf Bankı, Avropa İttifaqının Avropa İnvestisiya Bankı, Hollandiya İnkişaf Bankı (FMO), Avstriya İnkişaf Bankı, İsveçrə Konfederasiyasının SIFEM AG maliyyə inkişaf institutu, responsAbility Investments tərəfindən idarə olunan Avropanın investisiya fondları, EFSE, Symbiotics SICAV və GGF var. Bankda ən çox paya malik olan səhmdar Asiya İnkişaf Bankıdır.