Əmək və Əhalinin Sosial Müdafiəsi Nazirliyinin, Mərkəzi Bankın və Azərbaycan Banklar Assosiasiyasına (ABA) üzv bankların nümayəndələrinin "Kapital Bank" ASC-nin ofisində təşkil olunan görüşündə özünüməşğulluq proqramının genişləndirilməsində banklarla əməkdaşlıq məsələləri müzakirə olunub.

Bu barədə Marja-ya ABA-dan bildirilib.

ABA-nın prezidenti Zakir Nuriyev və Azərbaycan Mərkəzi Bankı Sədrinin müşaviri Əliyar Məmmədyarov həmçinin, Əmək və Əhalinin Sosial Müdafiəsi Nazirliyinin Məşğulluq  siyasəti və demoqrafiya şöbəsinin müdiri Elnur Süleymanov və Dövlət Məşğulluq Xidmətinin rəis müavini Rəşad Dayıyev Prezident İlham Əliyevin Azərbaycanda fəaliyyət göstərən özəl banklara özünüməşğulluq proqramına qoşularaq proqramın daha da geniş vüsət almasına dəstək olmaq çağırışının əhəmiyyətini vurğulayıblar.

Z.Nuriyev Assosiasiyaya üzv bankları bu çağırışa qoşulmağa və prosesin aktiv iştirakçısı olmağa dəvət edib. Dövlət başçısının tapşırığı ilə icra olunan özünüməşğulluq proqramının mühüm sosial-iqtisadi önəmini qeyd edib və bankların da iştirakı ilə proqramın daha da genişlənməsinin mühüm sosial-iqtisadi önəmini diqqətə çatdırıb.

Görüşdə Əmək və Əhalinin Sosial Müdafiəsi Nazirliyinin nümayəndələri özünüməşğulluq proqramı haqqında geniş təqdimatla çıxış edib və bankların proqramın icra mexanizmi barədə suallarını cavablandırıblar.

Qeyd edək ki, özünüməşğulluq proqramına cəlb olunmuş işsiz və işaxtaran vətəndaşlara biznes-planlarına uyğun olaraq mal və materiallar verilir. İşsiz və işaxtaran şəxslər həmin mal və materiallardan istifadə etməklə ailə bizneslərini qurmaqla gəlir əldə etməyə çalışırlar.

İndiyədək dövlətin vəsaitilə özünüməşğulluq proqramı iştirakçıları verilmiş mal və materiallar hesabına heyvandarlıq təsərrüfatı, un məmulatları, şirniyyat istehsalı sexləri, avtoyuma məntəqəsi və s. yaradıblar. Dünya Bankı da bu layihəyə 100 milyon dollar ayırıb.