"AccessBank"ın İdarə Heyətinin sədri Anar Həsənov "Yanvar ayından etibarən öz komandası ilə Bankı tərk edəcəkləri" barədə yayılan məlumata münasibət bildirib.

"Marja"nın məlumatına görə, Anar Həsənov yayılan məlumatın şaiyə olduğunu bildirib.

"AccessBank"ın komandasından ayrılan Bankın İcraçı direktoru Günay Cəlilovadır. O gələn ilin Yanvar ayından karyerasını başqa maliyyə təşkilatında davam etdirməyə qərar verib. Onun bizdən ayrılmasına kədərlənirik, çünki Günay xanımın son 14 il ərzində bizim üçün əvəzolunmaz əməyi olub. Digər tərəfdən fəxr edirik ki, "AccessBank"ın yetişdirdiyi peşəkar kadrlar digər banklarda yüksək vəzifələrdə çalışırlar, ölkəmizin maliyyə sisteminin gücləndirilməsində iştirak edirlər. Bunu da qeyd edim ki, bu qərar iki tərəfin anlayışla qəbul etdiyi və düzgün koordinasiya etdiyi qərardır. Bu qərarın ətrafında çoxlu şaiyələr yaranır. Hamı bilir ki, Günay xanım mənim komandamın üzvüdür, biz bərabər böyük bir yolu keçmişik. Ona görə, şaiyələr yaranır ki, "AccessBank"ın daxilində nələrsə baş verir. Tam əminliklə deyə bilərəm ki, Günay xanımın iş yerini dəyişməsi "AccessBank"ın gələcəyi ilə əlaqədar məsələ deyil. Günay xanımın ardınca mənim də işdən çıxacağım danışılır. Bu da şaiyədir. Mən Günay xanıma gələcək karyerasında uğurlar arzulayıram".

Qeyd edək ki, Günay Cəlilova Yanvar ayından "Yello Bank"da fəaliyyətini davam etdirəcək.

Xatırladaq ki, Dekabrın əvvəlində bəzi saytlarda "Yelo Bank"ın rəhbərliyində dəyişikliklər olduğu barədə xəbər yayılmışdı.

 
Bankın mətbuat xidmətindən Nurlana Musayeva "Marja"ya bildirmişdi ki, dəyişikliklər rəsmi təsdiqlənməyib:

 
"Bəzi saytlarda "Yelo Bank"ın  rəhbərliyində dəyişikliklər baş veridiyi barədə məlumat yayımlanıb. Bu məlumat rəsmi təsdiqlənməyib. Belə bir dəyişikliklərin gələn ilin əvvəli baş verilməsi nəzərdə tutulur. Rəsmi təsdiq olan kimi, mətbuat məlumatlandırılacaq".