2019-cu ilin yanvar ayında ölkə Prezidenti İlham Əliyev Dünya Bankının (DB) keçmiş baş icraçı direktoru, Beynəlxalq Valyuta Fondunun hazırki icraçı direktoru xanım Kristalina Georgiyeva ilə Davosda keçirdiyi görüşündə DB ilə əməkdaşlığı yüksək qiymətləndirmiş və bu əməkdaşlığın davam etdirilməsinin vacibliyini vurğulamışdır. Xanım Georgiyeva Azərbaycanın nail olduğu maliyyə-iqtisadi qüdrətini nəzərə alaraq Dünya Bankı Qrupuna daxil olan Beynəlxalq İnkişaf Assosiasiyasının (BİA) yoxsul ölkələrə yardım proqramına donor ölkə kimi qoşulmasını təklif etmişdir. Qeyd etmişdir ki, Azərbaycan vaxtilə DB-dən yardım alan ölkədən qısa müddətdə donor ölkəyə çevrilib. Bu da son iyirmi ildə Azərbaycanda bütün sahələrdə həyata keçirilən islahatların nəticəsində mümkün olub. Dövlətimizin başçısı DB-nin sözügedən proqramda Azərbaycanın donor kimi çıxış etmək təklifini məmnuniyyətlə qəbul etmişdir.

Azərbaycan Mərkəzi Bankının yaydığı məlumatda bildirilir ki, 12 dekabr 2019-cu il tarixində İsveçin Stokholm şəhərində keçirilən BİA-nın 19-cu Resurslara Əlavələr Təşəbbüsü üzrə yekun iclasında Azərbaycanın vaxtilə BİA-dan kredit alan ölkədən DB-nin yoxsul ölkələrə yardım proqramına dəstək göstərən donor ölkəyə çevrilməsi barədə rəsmi qərar qəbul edilmişdir. Bununla da Azərbaycan BİA-ya yalnız maliyyə dəstəyi göstərən ölkə yox, eyni zamanda BİA ölkələri ilə özünün uğurlu inkişaf təcrübəsini bölüşməyə hazır ölkə kimi qiymətləndirilmiş olub. 

Azərbaycanın BİA-ya donor ölkə olması onun beynəlxalq arenada nüfuzunun artması və etibarlı qlobal tərəfdaş olmasının yeni bir nümunəsidir. Hazırda BİA-ya üzv olan 173 ölkədən yalnız 55-i donor ölkə statusuna malikdir. 

 
Qeyd etmək lazımdır ki, əslində Azərbaycan vaxtilə BİA üzrə kreditlərin böyük hissəsini vaxtından əvvəl ödəməklə quruma donorluq dəstəyi göstərmişdir. Belə ki, 2012-ci ildə BİA Azərbaycanın böyük iqtisadi uğurlara nail olduğunu, maliyyə qüdrətinin artdığını və bunun nəticəsində dünyada yuxarı orta gəlirli ölkələr sırasına daxil olduğunu nəzərə alaraq, qalıq borcların ödənilməsinin sürətləndirilməsi və vaxtından əvvəl qismən ödənilməsi üçün Azərbaycana müraciət etmişdir. Azərbaycan bu müraciətə dəstək olaraq 2013-cü ildə BİA-ya 300 milyon dollar vəsait ödəmişdir.