“Rabitəbank”ın yeni “Kartmane” kartları üzrə ilk satış hədəfi 50 min ədədlik saya çatmaqdır

"Hazırda “Rabitəbank”ın “Kartmane” kartlarının sayı 15 min ədəddir. 2020-ci ilin sonunadək daha 35 min kart satılaraq sayın 50 min ədədə çatdırılması nəzərdə tutulur".

Bunu “Marja”ya “Rabitəbank”ın Baş direktoru Ziya Nuriyev bildirib.

Bankın Baş direktoru qeyd edib ki, hazırda Azərbaycanda bank xidmətləri ilə əhatə olunmayan kifayət sayda əhali var: “İlk növbədə bank xidmətləri ilə əhatə olunmayan əhali hədəfimizdə olacaqdır. Eyni zamanda, mövcud kart sahiblərinin “Kartmane”ni maraqla qarşılayacaqlarını gözləyirik. Çünki “Kartmane” ilə xərcləyib qazanmaq daha sərfəlidir. “Kartmane” sahibləri 10-dan artıq imtiyazlara sahib olacaqlar, bu imtiyazlardan 10%-dən “cashback”, kart qalığına 6% əlavə gəlirin hesablanması, götürülən kreditdən 100 gün müddətində faizsiz istifadə edilməsi imtiyazlarını qeyd edə bilərəm”.

Ziya Nuriyev əlavə edib ki, eyni zamanda “Rabitəbank”ın bütün kartlarının adı “Kartmane”yə dəyişdiriləcəkdir.  

“Kart 5 illik təqdim edilir. Kartın illik qiyməti 10 manatdır. Əgər müştəri hesabına minimum 500 manat mədaxil edərsə kart pulsuz təqdim edilir. Həm debet və həm də kredit “Kartmane” kartımızda bonus proqramı mövcuddur. Bütün kartlarımız “Kartmane” və “Kartmane Premium” olacaq. Gələn ilin 1-ci rübü ərzində bonus proqramını iş adamlarına təklif etdiyimiz “Bizkart”lara da şamil edəcəyik. Biz gələn il ərzində əməkhaqqı kartlarının da “Kartmane” kartına çevrilməsini nəzərdən keçirəcəyik. Bankın kart bazasının yalnız “Kartmane”lərdən ibarət olmasını qarşımıza məqsəd qoymuşuq. Biz istəyirik ki, bonus proqramı bütün müştərilər üçün əlatan olsun”.

10%-DƏK "CASHBACK", 100 GÜNLÜK GÜZƏŞT MÜDDƏTİ

İndiyədək debet versiyası olan “Kartmane”nin Dekabr ayının 1-dən etibarən kredit versiyası da satışa çıxacaq. “Kartmane” kredit kartının ən mühüm üstünlüyü Azərbaycanda ilk dəfə 100 gün güzəşt müddətini təqdim etməsidir. Kart sahibi borc götürdüyü vəsaitdən 100 gün ərzində faizsiz istifadə edə biləcəkdir.

Həm “Kartmane”debet, həm də “Kartmane” kredit kartlarında “cashback”ın yüksək faizləri diqqəti cəlb edir. Xərclənən məbləğin 10%-dək hissəsi geri aytarılacaqdır.

HƏMÇİNİN OXU:Azərbaycanın qocaman bankı imicini dəyişdi - FOTOLAR

Qeyd edək ki, “Kartmane” debet kartı tamamilə yenilənib, özündə əlavə imtiyazları birləşdirir. “Kartmane” kredit kartı ilk dəfədir bazara təqdim edilir.