“Unibank”ın müştərilərə verdiyi kreditlərin artması ilə faiz, haqq və komissiya gəlirləri artıb. Eyni zamanda, Bank, problemli kreditlərin azalması ilə ehtiyatdan qayıdan vəsait hesabına kapitalını bərpa edir.

“Unibank” ASC 2019-cu ilin yanvar-sentyabr dövrünü (9 ay) 66 milyon 803 min manat xalis mənfəət ilə başa vurub. Ötən ilin eyni dövrü ilə müqyisədə Bankın xalis mənfəəti təxminən 2 dəfə artıb. Belə ki, “Unibank” ASC 2018-ci ilin yanvar-sentyabr dövrünü 34 milyon 110 min manat xalis mənfəət ilə bağlamışdı.

“Marja” Bankın maliyyə hesabatlarına istinadən xəbər verir ki, 2018-ci ilin yanvar-sentyabr dövrü ilə müqayisədə 2019-cu ilin yanvar-sentyabr dövründə “Unibank”ın faiz gəlirləri 29 milyon 426 min manat və ya 85% artaraq 64 milyon 58 min manat, qeyri-faiz gəlirləri isə 2 milyon 379 min manat və ya 18% artaraq 15 milyon 549 min manat təşkil edib.

2019-cu ilin 9 ayı ərzində “Unibank”ın cəmi gəlirləri 79 milyon 629 min manat, cəmi xərcləri isə 70 milyon 366 min manat təşkil edib. Gəlirlər xərcləri üstələdiyindən Bankın 9 milyon 263 min manat əməliyyat mənfəəti yaranıb. Eyni zamanda, əvvəlki dövrlərdə ehtimal olunan kredit itkiləri üçün yaradılmış ehtiyatdan 57 milyon 591 min manatın azad olması hesabına mənfəət 66 milyon 853 min manata yüksəlib. “Unibank” 51 min manat mənfəət vergisi də ödəyib və beləliklə, 9 ayı 66 milyon 803 min manat xalis mənfəət ilə başa vurub.

Müqayisə üçün qeyd edək ki, 2018-ci ilin 9 ayında “Unibank”ın cəmi gəlirləri 48 milyon 825 min manat, cəmi xərcləri (faiz, qeyri-faiz, inzibati və s.) isə 54 milyon 384 min manat təşkil edtmişdi. Nəticədə 5 milyon 559 min manat əməliyyat zərəri yaranmışdı. Lakin, ehtimal olunun kredit itkiləri üçün əvvəlki dövrlərdə yaradılmış ehtiyatdan azad olmuş 39 milyon 732 min manatı hesabına həm əməlyyat zərəri bağlanmış, həm də 34 milyon 110 min manat xalis mənfəət təmin edilmişdi.

2018-ci ilin yanvar-sentyabr dövrü ilə müqayisədə 2019-cu ilin yanvar-sentyabr dövründə “Unibank”ın cəmi gəlirləri 30 milyon 804 min manat və ya 63%, cəmi xərcləri isə 15 milyon 982 min manat və ya 29,4% artıb. Cəmi xalis gəlir artımı 14 milyon 822 min manat təşkil edib.

BANK BÖYÜYÜB

2019-cu ilin 9 ayı ərzində “Unibank”ın cəmi aktivləri 93 milyon 894 min manat artaraq 787 milyon 771 min manata, müştərilərə verilən kreditlər isə 37 milyon 461 min manat artaraq 425 milyon 114 min manata yüksəlib.

2019-cu ilin 9 ayı ərzində “Unibank”ın müştəri hesabları (depozitlər) 61 milyon 485 min manat artaraq 528 milyon 736 min manata çatıb.

Bankın mənfəət əldə etməsi ilə əlaqədar olaraq “Unibank”ın cəm kapitalı 2,2 dəfə artaraq 122 milyon 832 min manata yüksəlib.  9 ay ərzində məcmu kapitalın həcmi  30% artaraq 82 milyon 300 min manata çatıb.