Mərkəzi Bank, Dövlət Neft Fondu və Maliyyə Bazarlarına Nəzarət Palatasının birləşdiriləcəyi iddia edilir.

Dünya praktikasında belə bir təcrübə varmı? Bu optimallaşdırma siyasəti hansı iqtisadi nəticələrə səbəb ola bilər?

Bu qəbildən olan sualları Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov cavablandırıb.

V.Əhmədov qeyd edib ki, ölkə başçısının start verdiyi islahatlar çərçivəsində bu cür optimallaşdırılma aparılması mümkündür:

“Təbii ki, bu, ölkə başçısının səlahiyyətində olan məsələdir. Ümumilikdə bu optimallaşdırmaya getməzdən əvvəl araşdırmalar aparılmalı, onun effektlilik dərəcəsi nəzərə alınmalıdır. Elə etmək lazımdır ki, həm iqtisadi cəhətdən effektli olsun, həm də optimallaşdırmadan sonra ciddi problemlər yaranmasın.

Faktiki olaraq neft ixrac edən bütün dövətlərdə Neft Fondu fəaliyyət göstərir. Onların hər biri qəbul edilmiş nizamnaməyə uyğun olaraq çalışırlar. Dövlət Neft Fondu Mərkəzi Bankla əlaqəlidir, hərraclarda iştirak edir. Onların birləşdirilməsində heç bir maneə yoxdur”.

O ki qaldı Maliyyə Bazarlarına Nəzarət Palatasına, parlamentari qeyd edib ki, bu, lüzumsuz orqandır:

“Onun ayrıca fəaliyyət göstərməsinə heç bir ehtiyac yoxdur. Onsuz da Mərkəzi Bank o fəaliyyəti yerinə yetirir. Ümumilikdə bu 3 qurumun birləşdirilməsi mümkündür. Hətta bu optimallaşdırma siyasətinin bank sisteminin sağlamlaşdırılmasında böyük əhəmiyyəti ola bilər. Faktiki olaraq pul-kredit siyasətini həyata keçirən Mərkəzi Bankdır. Bütün xəzinə də buradadır. Belə optimallaşdırma siyasətinin aparılmasını düzgün hesab edirəm. Bu, daha çox Azərbaycan iqtisadiyyatının inkişafına səmərə verə, hətta bank sisteminin dirçəlməsində müəyyən rol oynaya bilər”.

Qeyd edək ki, bir sıra iqtisadçılar, Maliyyə Bazarlarına Nəzarət Palatası bank sektoru ilə bərabər sığorta, kapital bazarlarını, lotoreya fəaliyyətini tənzimlədiyindən və nəzarət etdiyindən, bu qurumun ləğv edilməsini inandırıcı hesab etmirlər.

Dünyanın bir sıra ölkələrində, bank sektorunu tənzimləyən və nəzarət edən qurum Mərkəzi Banka tabe deyil.

Lakin Dövlət Neft Fondunun Mərkəzi Banka birləşdirilməsi baş verə bilər. Məsələn, bu addıma səbəb kimi valyuta ehtiyatlarının bir mərkəzdən idarə edilməsi məqsədi göstərilə bilər 

"Marja"nın sorğusu əsasında, Maliyyə Bazarlarına Nəzarət Palatası Vahid Əhmədovun səsləndirdiyi fikirlərə münasibət bildirib:

"Maliyyə Bazarlarına Nəzarət Palatası Azərbaycan Respublikası Prezidenti cənab İlham Əliyevin 3 fevral 2016-cı il tarixli, 760 nömrəli Fərmanına uyğun olaraq, qiymətli kağızlar bazarı, investisiya fondları, sığorta, kredit təşkilatları və ödəniş sistemləri fəaliyyətinin lisenziyalaşdırılması, tənzimlənməsi və nəzarəti, həmçinin bu sahələr üzrə nəzarət sisteminin şəffaflığını və çevikliyini təmin etmək məqsədi ilə yaradılmışdır. Qurumun ləğvini və yenidən təşkilini də məhz Azərbaycan Respublikasının Prezidenti həyata keçirir. Vahid Əhmədovun fikirlərinə gəlincə, o ağsaqqaldır və yaşına görə bu kimi subyektiv fikirlər səsləndirməsi normaldır".

YATIRIM İNDİ DAHA RAHAT

© "Modern"