Maliyyə Bazarlarına Nəzaər Platasının yaydığı press-relizə görə, 30 sentyabr 2019-cu il tarixinə Azərbaycanda fəaliyyət göstərən bank olmayan kredit təşkilatlarının (BOKT) cəmi aktivləri 314,4 mln. manat, cəmi öhdəlikləri isə 188,6 mln. manat təşkil edib. Bundan əlavə Kredit ittifaqlarının (Kİ) 2019-cu ilin III rübündə cəmi aktivləri 15,9 mln. manat, cəmi öhdəlikləri isə 6,1 mln. manat təşkil edib.

Aktivlər

Cari ilin 9 ayı ərzində BOKT-lərin aktivləri 17,4% artmışdır. BOKT-lərin aktivlərinin əsas hissəsini (81,1%) kredit portfeli təşkil edib. Kredit portfeli dövr ərzində 11,8% (27,0 mln. manat) artaraq sentyabr ayının sonuna 255,0 mln. manat təşkil edib.

30 sentyabr 2019-cu il tarixinə Kİ-nın aktivlərinin 90%-ni (14,3 mln. manat) kredit portfeli təşkil edib.

Öhdəliklər

İlin əvvəli ilə müqayisədə BOKT-lərin öhdəlikləri 5% (9,1 mln. manat) artmışdır. Öhdəliklərin 47%-i (88,4 mln. manat) banklardan və digər maliyyə institutlarından cəlb edilmiş vəsaitlərdən ibarətdir. Dövr ərzində cəlb edilmiş vəsaitlərdə 3,5% (3,2 mln. manat) azalma olmuşdur. Qiymətli kağızlar vasitəsilə borclanma isə ilin əvvəli ilə müqayisədə 3,8% (1,1 mln. manat) artmışdır. Mərkəzi idarəetmə orqanlarının vəsaitləri dövr ərzində 13,6% (4,6 mln. manat) azalmışdır.

Kİ-nın öhdəliklərinin əsas hissəsi banklardan və digər maliyyə institutlarından alınmış kreditlərdən ibarətdir.   

Kapital

Sentyabr ayına BOKT-lərin Balans kapitalı 125,8 mln. manat təşkil edib. Bu ilin əvvəli ilə müqayisədə 42,5% (37,5 mln manat) çoxdur. Kredit ittifaqlarının balans kapitalı isə 9,8 mln. manat olub.

Mənfəət və zərər

2019-cu ilin 9 ayı ərzində BOKT-lər 14,0  mln. manat əməliyyat mənfəəti generasiya edib. BOKT-lərin xalis mənfəəti isə 14,7 mln. manat təşkil edib. Dövr ərzində Kİ-nın əməliyyat mənfəəti isə 1 mln. manata çatıb.

BOKT-lər üzrə ROA və ROE göstəriciləri müvafiq olaraq 6,2% və 15,6% təşkil edib.

Ümumi məlumatlar

Fəaliyyət göstərən 92 bank olmayan kredit təşkilatlarından 7-si xarici kapitallıdır, bunların hamısında xarici kapitalın payı 50%-100% arası təşkil edir. 30 sentyabr 2019-cu il tarixinə BOKT-lərin sayı 45, Kİ-nın sayı isə 47 olmuşdur. 9 ay ərzində BOKT işçilərinin sayı 7,2% (138 nəfər) artaraq 2043 nəfərə çatmışdır.