“PAŞA Bank” ənənəvi olaraq yarımilik və illik maliyyə göstəricilərinin açıqlanmasına həsr olunmuş mətbuat konfransı keçirir. 08 Oktyabr 2019-cu il tarixində keçirilmiş mətbuat konfransında cari ilin 1-ci yarısı üzrə maliyyə nəticələri açıqlandı və jurnalistlərin sualları cavablandırıldı.

Mətbuat konfransını “PAŞA Bank”ın Korporativ Kommunikasiyalar departamentinin direktoru Sona Abbasova açaraq bildirdi ki, “PAŞA Bank”ın əsas dəyərlərindən biri dürüstlükdür. Bugünkü mətbuat konfransı da dürüstlük dəyəri əsas tutularaq keçirilir.

Mətbuat konfransında "PAŞA Bank"ın İdarə Heyətinin üzvü, Baş Maliyyə İnzibatçısı Bəhruz Nağıyev çıxış edərək “PAŞA Bank” qrupunun  (“PAŞA Bank Azərbaycan”, “PAŞA Bank Türkiyə”, “PAŞA Bank Gürcüstan”) maliyyə göstəricilərini təqdim etdi.

Bəhruz Nağıyev bildirdi ki, 30 İyun 2019-cu il tarixində “PAŞA Bank” qrupunun cəmi aktivləri 5 milyard 43 milyon manata çatıb. Aktivlər ötən ilin eyni dövrü ilə müqayisədə 13% artıb. Aktivlərdəki artımın əsas səbəbləri müştərilərə verilən kreditlərin 23% artaraq 1 milyard 855 milyon manata, qiymətli kağızlara investisiyaların isə 57% artaraq 1 milyard 348 milyon manata yüksəlməsidir. 30 İyun 208-ci il tarixində qiymətli kağızlara investisiyalar 859 milyon 182 min manat təşkil etmişdi. Qiymətli kağızlara investisiyaların təxminən 489 milyon manat artması diqqəti cəlb edir.

Bəhruz Nağıyev bildirdi ki, 2018-ci ilin 1-ci yarısı ilə müqayisədə 2019-cu ilin 1-ci yarısında “PAŞA Bank”ın cəmi öhdəlikləri 15% artaraq 30 İyun 2019-cu il tarixində 4 milyard 523 milyon manat təşkil edib. Öhdəliklərin artmasının əsas səbəblərindən biri müştəri hesablarının artmasıdır. Müştərilərə ödənilməli olan məbləğlər 3 milyard 689 milyon manatı keçib.

“PAŞA Bank” qrupu 2019-cu ilin 1-ci yarısını 35 milyon 696 min manat xalis mənfəət ilə başa vurub. Bəhruz Nağıyev bildirib ki, 2018-ci ilin eyni dövrü ilə müqayisədə Qrupun xalis mənfəəti 1% artıb.

“PAŞA Bank” qrupu 2018-ci ilin 1-ci yarısını 35 milyon 394 min manat xalis mənfəətlə bağlamışdı.

Xalis mənfəətin 3 milyon 977 min manatı “PAŞA Yatırım Bankı”nın payına düşüb. 2019-cu ilin 1-ci yarısında “PAŞA Bank Gürcüstan”ın isə 2 milyon 298 min manat zərəri yaranıb. 

"2019-cu ilin yanvar-iyun dövründə "PAŞA Bank" Azərbaycanın xalis mənfəəti təxminən 34 milyon manat təşkil edib. Ötən ilin eyni dövründə bu rəqəm 27 milyon manat idi",- Bəhruz Nağıyev deyib.