Azərbaycan bankları əhalinin pullarından orta hesbala 3,8% qarşılığında istifadə edirlər. Orta faizin bu qədər aşağı olmasının səbəbləri xarici valyutada cəlb edilmiş əmanətlər üzrə orta faizin çox aşağı olması, cəmi əmanətlərin 37,2%-ni təşkil edən tələb olunanadək əmanətlər üzrə orta faizin sıfıra yaxın səviyyələrdə olmasıdır.

“Marja” Mərkəzi Bankın "Fiziki şəxslərin əmanətlərinin strukturu" adlı statistikasına istinadən xəbər verir ki, Avqust ayının əvvəlinə fiziki şəxslərdən cəlb edilmiş əmanətlərin cəmi məbləği 8 milyard 580 milyon manat təşkil edib. Cəlb edilmiş cəmi əmanətlər üzrə orta faiz dərəcəsi 3,8% təşkil edib.

Milli valyutadakı 3 milyard 745 milyon manatlıq əmanətlər orta hesabla 6,5%, xarici valyutadakı 4 milyard 835 milyon manat əmanətlər isə orta hesabla 1,6% ilə cəlb edilib.

Cəmi əmanətlərin 3 milyard 195 milyon manatı və ya 37,2%-i tələb olunanadək, 5 milyard 385 milyon manatı və ya 62,8%-i müddətli əmanətlər olub. Cəmi əmanətlərin 27,6%-ni və ya 2 milyard 371 milyon manatını milli valyutada müddətli əmanətlər, 35,2%-ni və ya 3 milyard 14 milyon manatını xarici valyutada müddətli əmanətlər təşkil edib. 

Milli valyutadakı 2 milyard 371 milyon manatlıq müddətli əmanətlər üzrə orta faiz dərəcəsi 10,2%, xarici valyutadakı 3 milyard 14 milyon manatlıq müddətli əmanətlər üzrə orta faiz dərəcəsi isə 2,6% təşkil edib. Xarici valyutadakı müddətli əmanətlərin milli valyutadakı müddətli əmanətlərdən yüksək olması diqqəti cəlb edir.

Tələb olunanadək əmanətlər üzrə orta faiz dərəcəsi milli valyutada 0,2%, xarici valyutada 0,1% təşkil edib. Qısası, banklar 3 milyard 195 milyon manatlıq tələb olunanadək əmanətlər üzrə cüzi faizlər ödəyirlər.

Əmanətlərin 94%-i və ya 8 milyard 51 milyon manatı Bakı şəhəri və Abşeron iqtisadi rayonundan cəlb edilib. Digər regionlardan cəmi 529 milyon manat əmanət cəlb edilib.

Məlumat üçün bildirək ki, bank əmanəti müqaviləsi əmanətin ilk tələb üzrə verilməsi şərti ilə (tələbli əmanət) və ya əmanətin müqavilədə müəyyənləşdirilmiş müddət başa çatdıqdan sonra şərti ilə (müddətli əmanət) bağlanır.