Maliyyə Bazarlarına Nəzarət Palatasının aylıq statistikasına görə, 31 İyul 2019-cu il tarixində banklarda fiziki şəxslərin cəmi 8 milyard 471.6 milyon manat depoziti olub. İyun ayının sonu ilə müqayisədə fiziki şəxslərin depozitləri 162,2 milyon manat azalıb.

"Marja"nın məlumatına görə, Palatanın icmalından məlum olur ki, azalma tələbli əmanətlərin 182,1 milyon manat azalaraq 3 milyard 114.3 milyon manata düşməsi ilə bağlıdır.

İyun ayının sonu ilə müqayisədə İyul ayında müddətli əmanətlər 19,9 milyon manat artaraq 5 milyard 357.3 milyon manata qalxıb.

Mərkəzi Bankın statistikasına görə, 31 İyul 2019-cu il tarixinə fiziki şəxslərin banklardakı əmanətləri (əhalinin əmanətləri) 8 milyard 580 milyon manat təşkil edib.

İyun ayının sonu ilə müqayisədə İyulda fiziki şəxslərin banklardakı əmanətləri 156,3 milyon manat azalıb. İyunun sonunda əmanətlər 8 milyard 736,3 milyon manat təşkil etmişdi.

İyul ayında milli valyutada olan əmanətlər 56,3 milyon manat azalaraq 3 milyard 744,7 milyon manata, xarici valyutada olan əmanətlər isə 99,9 milyon manat azalaraq 4 milyard 835,4 milyon manata düşüb.

İyulun sonunda cəmi əmanətlərin 43,6%-i milli valyutada, 56,4%-i xarici valyutada olub.

Xəbər verdiyimiz kimi, Əmanətlərin Sığortalanması Fondunun Himayəçilik Şurası Azərbaycan Respublikasının Maliyyə Bazarlarına Nəzarət Palatası və Mərkəzi Bankla razılaşdırılmaqla 1 iyul 2019-cu il tarixindən etibarən milli valyutada olan qorunan əmanətlər üzrə illik faiz dərəcəsinin yuxarı həddini 10%, xarici valyutada isə 2,5% müəyyən etmişdir. Bu tarixdən əvvəl yuxarı hədlər müvafiq olaraq 15% və 3% idi.

Müddətli depozitlər:

Müqavilə əsasında razılaşdırılmış müddətdə bankda yerləşdirilir və həmin müddət üçün faiz dərəcələri hesablanır. Vəsaiti vaxtından əvvəl hesabdan götürdükdə faizlərin bir hissəsini itirmək mümkündür.

Tələbli depozitlər:

Müştəri öz vəsaitini qeyri-müəyyən müddətə bankda yerləşdirir və istədiyi anda bankdan çıxara bilir. Belə məbləğlərə ya ümumiyyətlə faiz hesablanmır, ya da inflyasiyaya uyğun faizlər hesablanır. (həmçinin vəsait saxlanma müddətinə uyğun olaraq faizlərin artırdığı əmanətlər də vardır, məsələn ilk ay 2%, növbəti ay 3% və s).