2019-cu ilin İyul ayında Azərbaycanda kredit qoyuluşları 198,7 milyon manat artaraq 13 milyard 681,3 milyon manata yüksəlib. İyunun sonunda kredit qoyuluşları 13 milyard 482,6 milyon manata çatmışdı.

“Marja” Mərkəzi Bankın statistikasına istinadən xəbər verir ki, cari ilin 7 ayı ərzində isə kredit qoyuluşları 661,1 milyon manat artıb. Ötən ilin sonunda kredit qoyuluşları 13 milyard 20,3 milyon manat təşkil etmişdi.

ARTIM ƏSASƏN İSTEHLAK KREDİTLƏRİNDƏN QAYNAQLANIR

Kredit qoyuluşlarındakı artımın böyük hissəsi istehlak kreditlərinin artması ilə bağlıdır. Belə ki, İyun ayının sonu ilə müqayisədə İyulda ev təsərrüfatlarına verilən kreditlər 136,5 milyon manat, ötən ili sonu ilə müqayisədə cari ilin 7 ayı ərzində isə 618,7 milyon manat artaraq5 milyard 938,3 milyon manata çatıb. Ev təsərrüfatlarına verilən kreditlərin cəmi kredit qoyuluşlarında xüsusi çəkisi 43,4%-ə yüksəlib (kreditlərin yarıya yaxını ev təsərrüfatlarına verilən kreditlərdir).

Ev təsərrüfatlarına verilmiş 5 milyard 938,3 milyon manat kreditlərin 1 milyard 926,2 milyon manatı daşınmaz əmlakın tikintisinə və alınmasına (ipoteka krediti daxil olmaqla) verilən kreditlər təşkil edib. Bu kreditlər İyulda 4,9 milyon manat, 7 ay ərzində isə 55,4 milyon manat artıb. Beləliklə, istehlak kreditləri İyulda 131,6 milyon manat, 7 ay ərzində isə 563,3 milyon manat artıb.

GƏLİRİN SƏNİ QANE ETMİRSƏ, HƏR SANİYƏ QAZANA BİLƏCƏYİN YATIRIMA BAŞLA!

Elman Rüstəmov Prezidentin yanındakı müşavirədə xəbərdarlıq etmişdi

Azərbaycan Respublikasının Prezidenti İlham Əliyevin yanında sosial-iqtisadi sahə ilə bağlı müşavirədə Mərkəzi Bankın sədri Elman Rüstəmov əhaliyə verilən cəmi kreditlərin bankların kredit portfelinin yarısına yaxınlaşmasının problemlər yarada biləcəyi barədə xəbərdarlıq etmişdir:

“Mərkəzi Bank hesab edir ki, biz diqqətli olmalıyıq. İstehlak kreditlərinin artması diqqətlə izlənilməlidir. Həm bütövlükdə əhalinin borc yükünün artmasını, həm də bank sektorunun portfelində bunun 50 faizə yaxınlaşmasını izləməliyik ki, sabah bu, hansı problemlər yarada bilər.”