Təkrar keçirilmiş İstanbul Böyükşəhər Bələdiyyə sədri seçkisini rəsmi olmayan nəticələrə görə, Millət İttifaqının namizədi Əkrəm İmamoğlu (Ekrem İmamoğlu) qazanıb. 

Türkiyə Mərkəzi Seçki Komissiyasının (YSK) açıqladığı aktlarına görə, 31 Martda keçirilmiş seçkidə Əkrəm İmamoğlu Binali Yıldırımdan 13 min 729 daha çox səs toplamışdı. Rəsmi olmayan nəticələrə görə, 23 İyunda keçirilmiş seçkidə rəqibindən 806 min 415 səs fərq ilə seçkini qazanan İmamoğlu, Binalı Yıldırımla yarışda fərqi 31 Mart ilə müqayisədə təxminən 59 dəfə (58,738) artırıb.

 
"Marja" xəbər verir ki, 10 milyon 570 min 222 seçicinin olduğu İstanbulda qurulan 31 min 186 qutunun 30 min 989-u açılıb. Rəsmi olmayan nəticələrə görə, qutularının 99,37%-i açılıb. Seçkidə 8 milyon 868 min 664 səs verilib və bu səslərin 8 milyon 696 min 552-si etibarlı sayılıb. Seçkidə iştirak nisbəti 84,42% olub.
 

CHP İstanbul Böyükşəhər Bələdiyyə namizədi Əkrəm İmamoğlu 4 milyon 741 min 868, AKP İstanbul Böyükşəhər Bələdiyyə namizədi Binalı Yıldırım isə 3 milyon 935 min 453 seçicinin səsini alıb. İmamoğlunun səs nisbəti 54,21 faiz, Yıldırım səs nisbəti 44,99% olaraq reallaşıb. İki namizəd arasında səs fərqi 806 min 415 olub.  
 

Digər tərəfdən, ləğv edilən 31 Mart seçkisində İmamoğlu səslərin 48,77%-ni, Yıldırım 48,61%-ini yığmışdı. Bu seçkidə İmamoğlu 4 milyon 169 min 765, Yıldırım isə 4 milyon 156 min 36 seçicinin səsini almışdı. İki namizəd arasında səs fərqi 13 min 729 olaraq reallaşmışdı.

Yenilənən İstanbul Böyükşəhər Bələdiyyə sədri seçkisində, namizədlərin 31 Martda topladığı səs nisbəti ilə 23 İyun seçkisində topladığı səs nisbəti arasında mühüm dəyişikliklər baş verib.
 

CHP-nin namizədi Əkrəm İmamoğlu bütün rayonlarda səs nisbətini artırıb, AKP-nin namizədi Binali Yıldırımın  səs nisbəti bütün rayonlarda düşüb.

Türkiyə Prezidenti Rəcəb Tayyib Ərdoğan "İstanbulu uduzmaq, bütün Türkiyəni uduzmaq deməkdir" demişdi.