İran İnqilab Keşikçiləri Ordusu Hava Qüvvələrinin Komandanı Əmir Əli Hacızadə, ABŞ-a aid insansız hava vasitəsini (dronu) müşayiət edən və içində 35 nəfərin olduğu bir kəşfiyyat və hərbi təyyarəni də müəyyən etdiklərini, ancaq onu vurmadıqlarını söyləyib.
 
 
İranın "Fars"xəbər agentliyinə görə, paytaxt Tehranda mətbuata açıqlama verən Hacızadə, "ABŞ-a məxsus casus dron aşkar edildiyi an içərisində 35 nəfərin olduğu ABŞ-ın P-8 (Poseidon) tipi bir casus təyyarəsi də vurulan dronun yaxınlığında idi. Onu da vurardıq, ancaq bunu etmədik", - deyib.
 
 
İranın, ABŞ-ın hava məkanı pozuntularına diplomatik kanallarla bir neçə dəfə etiraz etməsinə baxmayaraq, Vaşinqtonun bu etirazlara əhəmiyyət vermədiyini dilə gətirən Hacızadə, "Biz eyni hərəkətləri Vaşinqton sahillərində etsəydik, onlar necə reaksiya verərdi? Hava məkanlarını pozsaydıq icazə verərdilər?" suallarını yönəldib.
 

İran İnqilab Keşikçiləri Ordusu, Oman Körfəzinə sahili olan Hürmüzgan əyalətinə bağlı Kuhmubarek şəhəri sahilində "İranın hava məkanını pozan" ABŞ Hərbi Hava Qüvvələrinə məxsus "RQ-4 Global Hawk" tipli dronun qurudan raketlə vurularaq endirildiyini bildirmişdi.
 

ABŞ Mərkəzi Komandanlığı (CENTCOM) isə Hörmüz Boğazı üzərində uçan ABŞ Hərbi Hava Qüvvələrinə aid insansız hava vasitəsinin İran tərəfindən vurulduğunu təsdiqləmiş, ancaq sözügedən dronun "beynəlxalq hava məkanında" uçarkən vurulduğunu açıqlamışdı.

"ZƏRBƏYƏ 10 DƏQİQƏ QALMIŞ ONU DAYANDIRDIM"

ABŞ Prezidenti Donald Tramp İrana zərbə endirmək barədə əmr verməyə hazırlaşdığını, lakin son anda qərarını dəyişdiyini etiraf edib.

Donald Tramp bu barədə özünün “Twitter” səhifəsində yazıb: “Ötən gecə biz üç müxtəlif obyektə zərbə vurmağa tam hazır idik, lakin mən nə qədər insanın həlak ola biləcəyini soruşdum. General cavab verdi ki, 150 nəfər. Zərbəyə 10 dəqiqə qalmış mən onu dayandırdım. Hücum bir dronun vurulmasına cavab olmayacaqdı. İran heç vaxt nüvə silahı sahibi olmayacaq. Ordumuz hazırdır və dünyanın ən yaxşısıdır”.