“NBC Bank” 2019-cu ilin 1-ci rübü üzrə maliyyə göstəricilərini açıqlayıb.

GƏLİRLƏRİ ARTIB

“Marja” Bankın maliyyə göstəricilərinə istinadən xəbər verir ki, 2019-cu ilin yanvar-mart dövründə “NBC Bank”ın cəmi gəlirləri 5 milyon 521 min manat, cəmi xərcləri isə5 milyon 858 min manat təşkil edib. Xərclər gəlirləri üstələdiyindən bankın 337 min manat əməliyyat zərəri yaranıb. “NBC Bank” Aktivlər üzrə mümkün zərərlərin ödənilməsi üçün xüsusi ehtiyatın yaradılmasına 257 min manat da ayırdığından zərər 594 min manata yüksəlib.

Müqayisə üçün qeyd edək ki, “NBC Bank” ASC 2018-ci ilin 1-ci rübünü 818,1 min manat xalis mənfəət ilə başa vurmuşdu. Ötən ilin ilk 3 ayında “NBC Bank”ın cəmi gəlirləri 4 milyon 613 min manat,  cəmi xərcləri 3 milyon 938 min manat, əməliyyat mənfəəti 675 min manat təşkil etmişdi. Həmçinin ehtiyatlardan 144 min manat gəlirə əlavə edilmişdi.

2018-ci ilin ilk rübü ilə müqayisədə 2019-cu ilin ilk rübündə “NBC Bank”ın faiz gəlirləri 610 min manat və ya 15,3% artaraq 4 milyon 584 min manat təşkil edib. 2018-ci ilin 1-ci rübündə Bankın faiz gəlirləri 3 milyon 974 min manat təşkil etmişdi. Qeyri – faiz gəlirləri isə 639 min manatdan 937 min manata yüksəlib (298 min manat çox).

TƏK ŞƏXSİYYƏT VƏSİQƏSİLƏ 15 DƏQİQƏYƏ KREDİT!

Gəlirlər ilə bərabər xərclər də artıb. Faizlər və onunla bağlı xərclər 1 milyon 125 min manat və ya 46,8% artaraq 3 milyon 529  min manat, qeyri-faiz xərcləri isə 795 min manat və ya 51,8% artaraq 2 milyon 329 min manat təşkil edib.

2018-ci ilin ilk rübü ilə müqayisədə 2019-cu ilin ilk rübündə “NBC Bank” cəmi gəlirləri 908 min manat, cəmi xərcləri isə 1 milyon 920 min manat artıb. Xərclərin artması gəlirlərin artmasını üstələyib. Bu səbəbdən Bankın əməliyyat zərəri yaranıb. 

BANK BÖYÜYÜB, MÜŞTƏRİLƏRƏ VERİLƏN KREDİTLƏR ARTIB

31 Mart 2019-cu il tarixində "NBC Bank" 288 milyon 374 min manat cəmi aktivlərə malik olub. Aktivlərin 212 milyon 489 min manatını müştərilərə verilmiş kreditlər təşkil edib. 2018-ci ilin sonunda Bankın 283 milyon 376 min manat cəmi aktivlərinin 204 milyon 469 min manatını müştərilərə verilmiş kreditlər təşkil etmişdi. 31 Mart 2018-ci il tarixində isə müştrilərə verilmiş kreditlər 164 milyon 628 min manat təşkil etmişdi. Son 1 ildə Bankın kredit portfeli 29,1% artıb. Müştərilərə verilən kreditlərin artması ilə Bankın gələcəkdə gəlirlərinin artacağı gözlənilir. 

BANKDA DEPOZİTLƏR ARTIB

Son 12 ay ərzində "NBC Bank"da depozitlər 82 milyon 529 min manatdan106 milyon 135 min manata qalxıb (28,6% artım).

31 Mart 2019-cu il tarixində "NBC Bank" 56 milyon 498 min manat məcmu kapitala malik olub, bu da minimal tələb olan 50 milyon manatdan yüksəkdir.