“Muğan Bank” ASC 2018-ci ilin 9 ayını 650 min manat xalis mənfəət ilə başa vurub. Halbuki Bank, cari ilin 6 ayını 2 milyon 774 min manat xalis zərər ilə bağlamışdı.

GƏLİRLƏRİ XƏRCLƏRİNİ BAĞLAYIR

“Marja” Bankın maliyyə hesabatlarına istinadən xəbər verir ki, 2018-ci ilin yanvar-sentyabr aylarında “Muğan Bank”ın cəmi gəlirləri 43 milyon 69 min manat (30 milyon 185 min manatı faiz, 12 milyon 884 min manatı qeyri-faiz gəlirləri), cəmi xərcləri isə 42 milyon 419 min manat təşkil edib. Cəmi xərclərin 18 milyon 786 min manatını faiz xərcləri, 4 milyon 297 min manatını ehtiyatlara ayırma, 1 milyon 794 min manatını komission və qeyri faiz xərcləri, 10 milyon 642 min manatını işçı heyətini saxlanılması xərcləri, 6 milyon 900 min manatını ümumi administrativ və sair əməliyyat xərcləri təşkil edib.

Cəmi xərclər cəmi gəlirlərdən çıxıldıqdan sonra Bank 650 min manat xalis mənfəət əldə edib. Müqayisə üçün qeyd edək ki, “Muğan Bank” ASC 2017-ci ilin 9 ayını 4 milyon 627 min manat zərər ilə başa vurmuşdu.

"Muğan Bank"ın mənfəətə çıxmasının səbəbləri komission və qeyri faiz gəlirlərinin təxminən 2 dəfə artması, xarici valyuta əməliyyatları üzrə 2 dəfə çox, qiymətli kağızlar üzrə 1 milyon manat faiz gəlirləri əldə etməsi, eyni zamanda, ehtimal olunan depozit və kredit itkiləri üzrə ehtiyatlara ayırmanın (xərc) 4 dəfəyə yaxın azalmasıdır. Ötən ilin 9 ayında 5 milyon 691 min manat təşkil etmiş komission və qeyri faiz gəlirləri cari ilin eyni dövründə 10 milyon 974 min manata yüksəlib.

9 ay ərzində “MuğanBank” gəlirlərinin 4 milyon 297 min manatını kreditlər üzrə ehtiyyatların yaradılmasına ayırıb.“MuğanBank” ötən ilin eyni dövründə gəlirlərinin 16 milyon 466 min manatını kreditlər üzrə ehtiyyatların yaradılması üçün ayırmışdı. Ayırmanın azalması Bankda problemli kreditlərin artmasının səngidiyinə işarədir.

BANK BÖYÜYÜB

30 Sentyabr 2018-ci il tarixində "Muğan Bank" 560 milyon 494 min manat cəmi aktivlərə, 491 milyon 485 min manat cəmi öhdəliklərə və 69 milyon 9 min manat cəmi balans kapitalına malik olub.

31 Dekabr 2017-ci il tarixində "Muğan Bank" 480 milyon 177 min manat cəmi aktivlərə, 411 milyon 160 min manat cəmi öhdəliklərə və 69 milyon 17 min manat cəmi balans kapitalına malik idi. 

Bankı müştərilərə verdiyi kreditlər ötən ilin sonundakı 349 milyon 71 min manatdan 30 Sentyabr 2018-ci il tarixində 376 milyon 319 min manata yüksəlib (7,8% artım).

DEPOZİTLƏR ARTIB

"Muğan Bank"da ötən ilin sonu ilə müqayisədə müştəri hesabları 100 milyon 517 min manata artaraq 302 milyon 271 min manata çatıb. Banklardan və digər maliyyə institutlardan cəlb olunmuş vəsaitlər isə 20 milyon 660 min manat azalaraq 182 milyon 207 min manata düşüb. 

MƏCMU KAPİTALI ARTIB

30 Sentyabr 2018-ci il tarixində "Muğan Bank" 71 milyon 711 min manat məcmu kapitala malik olub. Bu da minimal tələbdən (50 milyon manat) yüksəkdir. Bank 2017-ci ilin sonunda 70 milyon 316 min manat məcmu kapitala malik idi.