“Moody`s” beynəlxalq reytinq agentliyi hesab edir ki, türk lirəsinin ucuzlaşması SOCAR şirkətinin STAR NEZ-in tikintisinə investisiyaların qaytarılması müddətinin uzadılmasına gətirəcək.

“Moody`s”in SOCAR-a dair dərc etdiyi icmalda vurğulanır ki, türk lirəsinin ucuzlaşması şirkət üçün müəyyən risklər yaradır.

“Son 5 il ərzində lirə 70%, 2018-ci ilin əvvəlindən - 40% ucuzlaşıb. Mübadilə məzənnəsinin volatilliyi və son 12 ay ərzində dəyərinin yarısını itirən lirənin ucuzlaşması SOCAR üçün ABŞ dollarında yatırılan investisiyaların qaytarılması ilə bağlı problemlər yaradacaq”, - agentlik qeyd edir.

2017-ci ildə Türkiyədə əməliyyatlardan SOCAR-ın gəlirləri 5 mlrd. manata yaxın təşkil edib, bu da şirkətin Azərbaycanda fəaliyyətindən əldə etdiyi gəlirlə müqayisə olunur.

Türkiyədə fəaliyyət məqsədilə SOCAR - SOCAR Turkey Yatırım AS törəmə şirkət yaradıb. 2017-ci ilin sonuna şirkətin investisiyaları 12,2 mlrd. manat həcmində qiymətləndirilir. Bu, əsasən $6,3 mlrd. həcmində qiymətləndirilən STAR NEZ-in tikinti layihəsinə sərmayələrdədir.

“NEZ 2018-ci ilin oktyabr ayında fəaliyyətə başlayacaq, emal həcmi illik 10 mln. ton təşkil edəcək. Tikinti üçün SOCAR $3,3 mlrd. həcmində layihə maliyyələşməsi cəlb edib, daha $3 mlrd. Azərbaycan tərəfinin sərmayələri təşkil edəcək. Ötən il SOCAR bu layihəyə 577 mln. manat yatırıb ($345 mln.). Hesab edirik ki, 2018-ci ildə layihəyə sərmayələr $600 mln.-a yaxın təşkil edəcək. Lirənin ucuzlaşması SOCAR-ın STAR-a investisiyaların qaytarılma müddətinin uzadılmasına səbəb olacaq”, - agentlik qeyd edir.

Bundan əkavə, lirəsnin ucuzlaşması Petkim neft-kimya kompleksinin fəaliyyətinə mənfi təsir göstərə bilər. “2017-ci ilin sonuna Petkim-in xarici öhdəlikləri $1,4 mlrd. həcmində qiymətləndirilir. Nafta istehlakçısı qismində Petkim xammal neftin qiymətinin volatilliyinə meyllidir. Bu, xammal alışına xərclərin artmasına gətirəcək, bu da holdinqin gəlirinin azalmasına səbəb ola bilər”, - hesabatda bildirilir.

“Moody`s”in qiymətləndirmələrinə görə, lirənin gələcəkdə ucuzlaşması “SOCAR Turkiye Enerji”nin 2021-ci ildə IPO keçirilməsinə dair planlarını dəyişdirə bilər.

ONLAYN MÜRACİƏT EDİN VƏ 1 GÜNƏ MANAT KREDİTİ ALIN

SOCAR-DAN AÇIQLAMA

Türkiyə lirəsinin məzənnəsinin dəyişkənliyi "SOCAR Turkey Enerji" şirkətinin aktivlərinin gəlirliliyinə nəzərəçarpacaq təsir göstərməyəcək.

Bu barədə "SOCAR Turkey Enerji" şirkətinin xarici əlaqələr üzrə rəhbəri Murat Lekompte bildirib.

M.Lekompte bildirib: "Əgər bizim Türkiyədəki müəssisələrdən danışırıqsa, Petkim neft-kimya kompleksi və STAR neft emalı zavodunda vəziyyətlər fərqlidir. Belə, Petkim-də istehsal olunan məhsulların 50 faizi Almaniya, ABŞ, Polşa və digər xarici ölkələrə göndərilir. Yəni, demək olar ki, məzənnənin dəyişkənliyi Petkim üçün risk yaratmır. STAR neft emalı zavoduna gəldikdə zavod fəaliyyət göstərməyə başlamayıb və tikinti mərhələsindədir. Burada lirənin məzənnəsinin aşağı düşməsi hər hansı bir dəyişikliyə səbəb olmur. Türkiyədə ən iri xarici investor kimi biz layihələrin həyata keçirilməsini və ölkə iqtisadiyyatına yatırımlar etməyi davam etdirmək niyyətindəyik".

ONLAYN MÜRACİƏT EDİN VƏ 1 GÜNƏ MANAT KREDİTİ ALIN

© İnterfaks-Azərbaycan, Trend