“Expressbank” ASC 2018-ci ilin birinci yarısını 992 min manat xalis mənfəətlə başa vurub. Xalis mənfəətin 749 min manatı 1-ci rübdə, 243 min manatı 2-ci rübdə əldə edilib.

"Expressbank” 2017-ci ilin birinci yarısını 1 milyon 780 min manat mənfəətlə bağlamışdı. Beləliklə, bankın xalis mənfəəti 44% azalıb.

“Marja” Bankın maliyyə hesabatına istinadən xəbər verir ki, “Expressbank”ın faiz gəlirləri 2018-ci ilin birinci yarısında 2017-ci ilin eyni dövrü ilə müqayisədə 15,3% artaraq 14 milyon 933 min manat təşkil edib. Bank 2017-ci ilin birinci yarısında 12 milyon 947 min manat faiz gəliri əldə etmişdi.

“Expressbank”ın əməliyyat gəliri isə 26,6% azalaraq 5 milyon 423 min manat təşkil edib. Bank 2017-ci ilin birinci yarısında  7 milyon 386 min manat əməliyyat gəliri əldə etmişdi.

Bank ötən ilin birinci yarısında ehtiyatlara 952 min manat ayırdığı halda, bu ilin eyni dövründə ehtiyatların 1 milyon 224 min manatı azad olub.  

XƏRCLƏRİ ARTIB

“Expressbank”ın 13 milyon 964 min manat əməliyyat mənfəətinə qarşı ümum və inzibati xərcləri 12 milyon 972 min manat təşkil edib. Nəticədə Bank, cari ili 992 min manat xalis mənfəətlə yarılayıb. Ötən ilin birinci yarısında 13 milyon 737 min manat cəmi əməliyyat mənfətinə qarşı ümumi və inzibati xərclər 11 milyon 983 min manat təşkil etmişdi.

MÜŞTƏRİLƏRƏ VERİLƏN KREDİTLƏR ARTIB

30.06.2018-ci il tarixində “ExpressBank” cəmi aktivləri 440 milyon 153 min manat (o cümlədən 205 milyon 365 min manatı müştərilərə verilmiş kreditlər) təşkil edib. 30.06.2017-ci il tarixində bankın cəmi aktivləri 280 milyon 085 min manat ( o cümlədən 167 milyon 864 min manatı müştərilərə verilmiş kreditlər ) təşkil etmişdi. Bankda nağd pul və pul ekvivalentlər 65 milyon 508 min manatdan 178 milyon 61 min manata yüksəlib. 

Portfelin problemli hissəsi 2,6%-dən 2,4%-ə enmişdir.  

İllik müqayisədə "Expressbank"da müştəri depozitləri 2,4 dəfə artaraq 261 milyon 350 min manat təşkiıl edib.

İyun ayının sonunda "Expressbank" 140 milyon 949 min manat məcmu kapitala malik olub. 

Hesabatda qeyd edilib ki, II rübdə əhalinin əmanətləri 7.5 milyon manat məbləğində artmışdır.

Rüb ərzində 24 min yeni müştəri hesabı açılmışdır.  Yeni sahibkar və hüquqi müştərilərin sayı rüblük 332 olmaqla, 12 mini keçmişdir.