“AtaBank” ASC 2018-ci ilin birinci yarısını təxminən 123 min manat xalis mənfəətlə başa vurub. Halbuki, Bank 2016-cı ilin birinci yarısında 10 milyon 550 min manat, 2017-ci ilin birinci yarısında isə 1 milyon 692 min manat  xalis mənfəət əldə etmişdi.

“Marja” xəbər verir ki, “AtaBank”ın faiz gəlirləri 2018-ci ilin birinci yarısında 2017-ci ilin eyni dövrü ilə müqayisədə 9,3% artaraq 21 milyon 8 min manat təşkil edib. Bank 2017-ci ilin birinci yarısında 19 milyon 222 min manat faiz gəliri əldə etmişdi. “AtaBank”ın qeyri-faiz gəlirləri isə 33,5% azalaraq 2 milyon 644 min manata düşüb. “AtaBank” 2017-ci ilin birinci yarısında 3 milyon 974 min manat qeyri-faiz gəliri əldə etmişdi.

Cari ilin birinci yarısında cəmi xərclər cəmi gəlirləri üstələdiyindən “AtaBank”ın 1 milyon 456 min manat əməliyyat zərəri yaranıb. Lakin ötən illər ehtimal olunan kredit və depozit itkiləri üçün yaradılmış ehtiyatların 1 milyon 578 min manatı azad olduğundan və mənfəətə əlavə edildiyindən, həm əməliyyat zərəri bağlanıb, həm də bank cari ilin birinci yarısını təxminən 123 min manat xalis mənfəətlə başa vurub.

1 GÜNƏ KREDİT ALIN!

2017-ci ilin birinci yarısında “AtaBank” 4 milyon manat əməliyyat mənfəətinə nail olmuş, bu mənfəətin  2 milyon 309 min manatını ehtiyatlara ayırmışdı.

30 İyun 2018-ci il tarixində “AtaBank” ASC -nin müştərilərə verdiyi kreditlər 465 milyon 78 min manat təşkil edib. 30 İyun 2017-ci il tarixində bu məbləğ 532 milyon 494 min manat idi.

30 iyun 2018-ci il tarixində “AtaBank” 603 milyon 176 min manat cəmi aktivlərə, 458 milyon 512 min manat cəmi öhdəliklərə və 144 milyon 664 min manat cəmi balans kapitalına malik olub.

Bank 30 İyun 2017-ci il tarixində  609 milyon 875 min manat cəmi aktivlərə, 458 milyon 143 min manat cəmi öhdəliklərə və 151 milyon 731 min manat cəmi balans kapitalına malik idi.

"AtaBank" İyun ayının sonunda 139 milyon 662 min manat məcmu kapitala malik olub. 

BANKA YATIRILAN ƏMANƏTLƏR ARTIB

“AtaBank”da depozitlər 2018-ci ilin birinci yarısında 2017-ci ilin eyni dövrü ilə müqayisədə 8,4% artaraq 315 milyon 593 min manat təşkil edib. O cümlədən, fiziki şəxslərin müddətli əmanətləri 225 milyon 365 min manatdan 273 milyon 373 min manata qalxıb.