“PAŞA Bank” ASC 2018-ci ilin birinci yarısını 22 milyon 162 min manat xalis mənfəətlə başa vurub. Bu ötən ilin anoloji dövrü ilə müqayisədə 64% çoxdur. Müqayisə üçün qeyd edək ki, “PAŞA Bank” ötən ilin birinci yarısını 13 milyon 531 min manat xalis mənfəətlə bağlamışdı.

“Marja” Bankın yerli standarlar əsasında hazırlanmış hesabatına istinadən xəbər verir ki, cari ilin birinci rübündə 6 milyon 532 min manat təşkil etmiş xalis mənfəət, ikinci rübdə 15 milyon 630 min manata yüksəlib.

“PAŞA Bank”ın faiz və qeyri-faiz gəlirləri azalıb. 2018-ci ilin yanvar-iyun dövründə PAŞA Bankın faiz gəlirləri 80 milyon 769 min manat, qeyri-faiz gəlirləri 13 milyon 162 min manat  təşkil edib. 2017-ci ilin birinci yarısında Bankın faiz gəlirləri 87 milyon 283 min manat, qeyri-faiz gəlirləri 29 milyon 575 min təşkil etmişdi. Qeyri-faiz gəlirlərinin kəskin azalmasının səbəbi xarici valyuta əməliyyatlarından gəlirlərin azalmasıdır. Belə ki, xarici valyutadan xalis gəlirlər 23 milyon 481 min manatdan 6 milyon 312 min manata düşüb. 

ONLAYN MÜRACİƏT EDİN VƏ 1 GÜNƏ MANAT KREDİTİ ALIN

Gəlirlərin azalması ilə bərabər, faiz qazandıran aktivlər üzrə dəyərsizləşmə üçün ehtiyata ayırma da azalıb və nəticədə bankın mənfəəti artıb. Belə ki, “PAŞA Bank” ötən ilin birinci yarısında ehtiyata 37 milyon 192 min manat ayırmışdı. Cari ilin 6 ayı ərzində bu rəqəm 14 milyon 100 min manat təşkil edib.

AKTİVLƏRİ 4 MİLYARD MANATA YAXINLAŞIR

30 İyun 2018-ci il rarixində “PAŞA Bank” ASC 3 milyard 901 milyon 761 min manat cəmi aktivlərə, 3 milyard 538 milyon 403 min manat cəmi öhdəliklərə və cəmi 363 milyon 358 min manat balans kapitalına malik olub. Bank 2017-ci ilin sonunda 3 milyard 551 milyon 787 min manat cəmi aktivlərə, 3 milyard 149 milyon 76 min manat cəmi öhdəliklərə və 402 milyon 711 min manat cəmi balans kapitalına malik idi.

KREDİT PORTFELİ 1 MİLYARD MANATI KEÇİB

Ötən ilin sonunda 943 milyon 99 min manat olmuş kredit portfeli (müştərilərə verilmiş kreditlər) 30 İyun 2018-ci il tarixində 1 milyard 37 milyon 236 min manata çatıb.