İqtisadi İslahatların Təhlili və Kommunikasiya Mərkəzində, Azexport.az portalı və Bank VTB - Azərbaycan arasında əməkdaşlıq haqqında Memorandum imzalanıb.

"Marja" xəbər verir ki, Memarandumu Azexport portalının rəhbəri Zaur Qardaşov və Bank VTB - Azərbaycanın idarə heyətinin rəhbəri Yevqeniy Kirin imzalayıblar.

Qeyd edək ki iki qurum arasında imzalanan memorandumun məqsədi VTB Bank qrupun təmsil olunduğu bir sıra ölkələrdə Azərbaycan ixracatçıları üçün yeni ixrac maliyyəsi imkanlarının təqdim edilməsi, birgə tədbirlərin və konfransların təşkili, biznes missiyaların təşkili, Azexport.az portalının imkanları barədə məlumat mübadiləsi, eyni zamanda yeni sığorta, nəqliyyat və logistika imkanlarının təqdim edilməsi nəzərdə tutulur.

Azexport portalının rəhbəri Zaur Qardaşov yeni əməkdaşlıq sənədinin Azexport portalının işinə böyük töhfə verəcəyini vurğulayıb:

“Məlum olduğu kimi, Rusiya Azərbaycanın kənd təsərrüfatı məhsulları üçün ənənəvi olaraq əsas bazarlardan biri kimi qalır. Araşdırmalar göstərir ki, ənənəvi bazarlara və yarmarkalara nisbətən market zəncirləri və digər dövlət və özəl satınalma müqavilələri daha çox əlavə dəyər təmin edən və etibarlı satış kanallarıdır. Bununla belə, Azərbaycan məhsullarının bu cür kanallarla satışına maneə yaradan amillərdən biri də göndərilən malların pulunun dövrü olaraq 60-90 gün müddətində ödənilməsidir ki, bu da öz növbəsində bir çox hallarda ixracatçı üçün fasiləsiz təchizatı təmin etməkdə çətinlik yaradır.”

Zaur Qardaşov əlavə edib ki, bu istiqamətdə Azərbaycanlı ixracatçılara dəstək olmaq, o cümlədən məhsullarını daha yüksək qiymətə satmaq və davamlı tərəfdaşlarla müqavilələr imzalamaq məqsədilə, Azexport, VTB Bankla birlikdə Rusiyanın mağaza zəncirləri və digər potensial müştərilərlə əməkdaşlıq çərçivəsində həmin şəxslərə mal göndərmək istəyən ixracatçılara qısa müddətli maliyyə vəsaiti təqdim edəcək. İxracatçılar fasiləsiz təchizatı təmin etmək məqsədilə, göndərilən malların dəyərini bir neçə gün müddətində bank vasitəsilə ala biləcəklər.

ONLAYN MÜRACİƏT EDİN VƏ 1 GÜNƏ MANAT KREDİTİ ALIN

Bank VTB - Azərbaycanın idarə heyətinin rəhbəri Yevqeniy Kirin də əlavə edib ki, VTB (Azərbaycan) – 20-dən çox ölkədə fəaliyyət göstərən beynəlxalq maliyyə qrupunun üzvüdür:

“Bankımızın əsas məqsədlərindən biri Azərbaycan biznesinə yeni bazarlara çıxışda yardım etməkdir. Əminəm ki, memorandumun imzalanması Azərbaycan-Rusiya ixracatçılarının maliyyə imkanlarını genişləndirməyə və sahibkarlıq fəaliyyətini stimullaşdırmağa imkan verəcək.”

Əlavə edək ki, Azexport portalı əlverişli maliyyə alətlərini təqdim etmək üçün digər ölkələrin bankları o cümlədən, Emirates NBD, Deutsche Bank və Raiffeisen kimi banklarla əməkdaşlığa dair danışıqlar aparılır.