Bank kapitalını artırmaqla fəaliyyətini genişləndirməyə hazırlaşır.

“AccessBank” 2018-ci ilin 1-ci rübü üzrə maliyyə göstəricilərini açıqlayıb.

“Marja” Bankın hesabatlarına istinadən xəbər verir ki, 2017-ci ilin yanvar-mart ayları ilə müqayisədə cari ilin eyni dövründə “AccesBank”ın faiz gəlirləri 26,8% azalaraq 21 milyon 723 min manat təşkil edib. “AccesBank” 2017-ci ilin yanvar-mart dövründə 29 milyon 683 min manat faiz gəliri əldə etmişdi. Rüblük müqayisədə “AccesBank”ın qeyri-faiz zərəri 1 milyon 920 min manatdan 3 milyon 52 min manata yüksəlib.

21 milyon 723 min manat gəlirə qarşı Bankın çıxarları 31 milyon 286 min manat təşkil edib. Lakin “AccesBank” ötən ilin 1-ci rübü ilə müqayisədə faiz və qeyri-faiz xərclərini azaltmağa nail olub. Ötən ilin ilk rübündə “AccesBank”ın 29 milyon 683 min manat faiz gəlirinə qarşı çıxarları 51 milyon 520 min manat təşkil etmişdi.

Diqqəti cəlb edən “AccesBank”ın zərərinin azalmasıdır. 2017-ci ilin ilk rübünü 21 milyon 837 min manat xalis zərər ilə başa vurmuş Bank, 2018-ci ilin 1-ci rübünü 8 milyon 601 min manat xalis zərər ilə bağlayıb. Əgər ötən il “AccesBank” aktivlər üzrə mümkün zərərlərin ödənilməsinə 14  milyon 138 min manat ayırmışdısa, bu il ehtiyatların 481 min manatı gəlirə çevrilib. Ehtiyatlara ayırmaların olmaması “AccesBank”da gecikmədə olan kreditlərin artmasının dayandığına işarədir.

Zərər ilə əlaqədar olaraq “AccesBank”ın məcmu kapitalı 43 milyon 953 min manatdan 32 milyon 72 min manata düşüb. “AccesBank”ın yaxın zamanlarda kapitalının artırılacağı gözlənilir.

Son 3 ayda“AccesBank”ın müştərilərə verdiyi cəmi xalis kreditlərin məbləği ötən ilin sonundakı 503 milyon 503 min manatdan 31 Mart 2018-ci il tarixindək 491 milyon 163 min manata enib. Bank 31 Mart 2018-ci il tarixində 824 milyon 979 min manat cəmi aktivlərə malik olub. Bu rəqəm 2017-ci ilin sonunda 844 mlyon 821 min manat təşkil etmişdi.

Diqqəti cəlb edən ilk 3 ayda “AccesBank”da depozitlərin ötən ilin sonundakı 399 milyon 815 min manatdan 31 Mart 2018-ci il tarixinədək 428 milyon 196 min manata yüksəlməsidir. Qeyd olunmuş tarixə bankın ani likvidlik əmsalı 117,44% təşkil edib. Bu isə bankda kifayət qədər likvid vəsaitin olması deməkdir.