"AG Bank" ASC mənfəətə çıxa bilmir. Bank 2018-ci ilin 1-ci rübünü də 3 milyon 223 min manat zərər ilə başa vurub və "AgBank"da yığılmış zərər 70 milyon 402 min manata çatıb.

2017-ci ilin 1-ci rübündə “AG Bank”ın xalis zərəri 1 milyon 807 min manat təşkil etmişdi. “AG Bank” 2015-ci ili 88 milyon 386 min manat, 2016-cı ili 64,4 milyon manat, 2017-ci ili isə 6 milyon 688 min manat zərər ilə bağlamışdı.

GƏLİRLƏRİ XƏRCLƏRİNİ ÖDƏMİR

Cari ilin yanvar-mart dövründə "AG Bank"ın cəmi gəlirləri 11 milyon 348 min manat, xərcləri isə 13 milyon 616 min manat təşkil edib. Nəticədə Bankın 2 milyon 268 min manat əməliyyat zərəri yaranıb. Aktivlər üzrə mümkün zərərlərin ödənilməsi üçün xüsusi ehtiyatın yaradılmasına 952 min manat ayrıldığından "Ag Bank"ın zərəri 3 milyon 223 min manata qalxıb.

2017-ci ilin yanvar-mart dövründə "AG Bank"ın cəmi gəlirləri 13 milyon 483 min manat təşkil etmişdi. Bankın faiz gəlirləri 6 milyon 477 min manatdan 4 milyon 949 min manata, qeyri-faiz gəlirləri isə 7 milyon 7 min manatdan 6 milyon 399 min manata geriləyib.

KAPİTALI "ƏRİYİB"

"Marja" Bankın açıqladığı maliyyə hesabatlarına istinadən xəbər verir ki, 30 Mart 2018-ci il tarixinə "AG Bank"ın məcmu kapitalı 40 milyon 425 manat təşkil edib.  2017-ci ilin sonunda Bank 44 milyon 572 min manat məcmu kapitala malik idi. Məcmu kapitalın azalmasının səbəbi yaranan zərərlərdir.

MÜŞTƏRİLƏRƏ VERİLMİŞ KREDİTLƏR AZALIB

Bankın müştərilərə verdiyi cəmi kreditlər 2017-ci ilin sonundakı 282 milyon 907 min manatdan 30 Mart 2018-ci il tarixində 278 milyon 797 min manata düşüb. Xalis kreditlər isə 240 milyon 423 min manatdan 236 milyon 484 min manata geriləyib. Müştərilərə verilmiş keditlərin 150 milyon 988 min manatının və ya 53%-nin ödəmə vaxtı keçib. 

30 Mart 2018-ci il tarixində "AG Bank" 504 milyon 289 min manat cəmi aktivlərə malik olub. 

ƏHALİNİN ƏMANƏTLƏRİ AZALIB

"AG Bank" da fiziki şəxslərin müddətli depozitləri 2017-ci ilin sonundakı 122 milyon 770 min manatdan 113 milyon 616 min manata düşüb.