“RabitəBank” ASC 2018-ci ilin 1-ci rübünün yekununa dair maliyyə göstəricilərini açıqlayıb.

“Marja” Bankın maliyyə hesabatlarına istinadən xəbər verir ki, cari ilin yanvar-mart dövründə “RabitəBank”ın cəmi gəlirləri 11 milyon 120 min manat təşkil edib. Bu, ötən ilin eyni dövrü ilə müqayisdə 17% çoxdur. “RabitəBank” 2017-ci ilin yanvar- mart dövründə 9 milyon 503 min manat cəmi gəlir əldə etmişdi.

Müqayisə olunan dövrdə, Bankın rüblük faiz gəlirləri 6 milyon 78 min manatdan 8 milyon 910 min manata qalxıb (46,6% artım), qeyri-faiz gəlirləri isə 3 milyon 425 min manatdan 2 milyon 210 min manata düşüb (35,5% azalma).

Faiz və qeyri-faiz xərclər çıxıldıqdan sonra Bankın xalis gəlirləri 5 milyon 577 min manat təşkil edib. Xalis gəlirlərin 3 milyon 342 min manatı inzibati xərclərə və 2 milyon 132 min manatı ehtiyatlara yönəldilib. Bank ilk rübü 102 min manat mənfəət (vergidən əvvəl) ilə başa vurub. 2017-ci ilin ilk rübündə “RabitəBank”ın mənfəəti 450 min manat təşkil etmişdi.

“RabitəBank”ın inzibati xərcləri və ehtiyatlara ayırmaları artıb.

MÜŞTƏRİLƏRƏ VERİLMİŞ KREDİTLƏR ARTIB

31.03.2018-ci il tarixində “RabitəBank”ın cəmi aktivləri 664 milyon 978 min manat təşkil edib. Aktivlərin 246 milyon 123 min manatını müştərilərə verilmiş kreditlər təşkil edib. 2017-ci ilin sonunda “RabitəBank”ın cəmi aktivləri 727 milyon 241 min manat, o cümlədən müştərilərə verilmiş kreditlər 234 milyon 645 min manat təşkil etmişdi.

Diqqəti cəlb edən “RabitəBank”ın faiz gəlirləri 46% artsa da faiz xərclərinin demək olar ki, dəyişməməsidir. Bu, səhmdar kapitalının artırılması nəticəsində Bank öz vəsaitlərinin artması ilə əlaqədar ola bilər.

Ötən ilin sonunda 653 milyon 852 min manat olmuş öhdəliklər 578 milyon 195 min manata geriləyib. Səbəb müştərilərin cari hesablarının və müştərilərin müddətli depozitlərinin azalmasıdır.

KAPİTALI XEYLİ ARTIB

2018-ci ilin ilk 3 ayında “RabitəBank”ın səhmdar kapitalı 12 milyon 800 min manat artaraq 101 milyon 300 min manata, cəmi balans kapitalı isə 13 milyon 394 min manat artaraq 86 milyon 783 min manata çatıb. Bankın məcmu kapitalı isə 92 milyon 195 min manatdan 104 milyon 774 min manata yüksəlib.