“AmrahBank”ın son vəziyyəti məlum oldu

“AmrahBank”ın son vəziyyəti məlum oldu

“AmrahBank” ASC 2018-ci ilin 1-ci rübünə dair maliyyə göstəricilərini açıqlayıb.

“Marja” Bankın maliyyə hesabatlarına istinadən xəbər verir ki, cari ilin yanvar-mart dövründə “AmrahBank”ın cəmi gəlirləri 3 milyon 587 min manat, o cümlədən faiz gəlirləri 2 milyon 124 min manat, qeyri-faiz gəlirləri 1 milyon 463 min manat təşkil edib. Xərclər (8 milyon 971 min manat) gəlirləri üstələdiyindən “AmrahBank” ilk rübü 5 milyon 384 min manat zərər ilə başa vurub.

Qeyd edək ki, 8 milyon 971 min manat cəmi xərcin 2 milyon 645 min manatını kreditlər üzrə ehtimal olunan zərərlər üçün ehtiyatlara ayırma xərci təşkil edib. Digər 6 milyon 326 min manat xərc isə faiz, qeyri-faiz və əməliyyat xərcləridir ki, bu da cəmi gəlirlərdən çoxdur.

2017-ci ilin 1-ci rübündə “AmrahBank”ın cəmi gəlirləri 7 milyon 164 min manat təşkil etmiş, Bank rübü 1 milyon 450 min manat xalis mənfəət ilə başa vurmuşdu.

Bank 2017-ci ili 1 milyon 450 min manat zərər ilə bağlamışdı. Bankın zərərinin əsas səbəbi gəlirin kreditlər üzrə ehtimal olunan zərərlər üçün ehtiyatlara yönəldilməsi və xərclərin yüksək olmasıdır.

Ötən ilin 1-ci rübünün sonu ilə müqayisədə “AmrahBank”ın cəmi aktivləri 242 milyon 274 min manatdan 198 milyon 326 min manat, o cümlədən müştərilərə verilmiş cəmi kreditlər 112 milyon 497 min manatdan 89 milyon 550 min manata geriləyib.

31.03.2018-ci il tarixində “AmrahBank” 37 milyon 110 min manat cəmi kapitala, 36 milyon 456 min manat məcmu kapitala malik olub. Yaranan zərərlər Bankın kapitalını silir.