Xəbər verdiyimiz kimi, Azərbaycan Respublikası Mərkəzi Bankının İdarə Heyəti 10 aprel 2018-ci il tarixindən uçot dərəcəsinin 13%-dən 11%-ə endirilməsi haqda qərar qəbul etmişdir. Faiz dəhlizinin yuxarı və aşağı həddləri isə uçot dərəcəsinə simmetrik diapazonda ±3% müəyyənləşdirilmişdir. Başqa sözlə, faiz dəhlizinin yuxarı həddi 16%-dən 14%-ə endirilib, aşağı həddi isə 8%-də saxlanılıb.

Məlumat üçün bildirək ki, depozit hərraclarında, qısamüddətli notların emissiyasında və REPO əməliyyatlarında faiz dərəcəsi - faiz dəhlizinin aşağı həddi ilə uçot faiz dərəcəsi arasında müəyyən edilir. Faiz dəhlizinin aşağı həddi və uçot dərəcəsi aşağı düşdükcə bu alətlərin də gəlirliliyi azalır. Mərkəzi Bank faiz dəhlizinin aşağı həddini dəyşmədiyi üçün, banklar depozit hərraclarından qazanmaqda davam edəcəklər. Son hərraclarda tələb təklifi üstələyir və nəticədə hərracın nəticəsində bağlanılmış depozit əqdləri üzrə orta ölçülmüş faiz dərəcəsi faiz dəhlizinin aşağı həddinə yaxın - 8,01% təşkil edir. Həraclarda tələb təklifdən yüksək olduğundan uçot dərəcəsinin aşağı salınması hazırkı vəziyyətdə təsirli deyil. Önəmli olan, faiz dəhlizinin aşağı həddinin 8%-də saxlanılmasıdır.

Mərkəzi Bank Fevral ayında depozit hərracını bir qədər sərfəsiz etmiş, faiz dəhlizinin yuxarı həddinin 18%-dən 16%-ə, aşağı həddinin isə 10%-dən 8%-ə endirilməsi barədə qərar qəbul etmişdi.

Faiz dəhlizinin parametrləri Mərkəzi Bankın İdarə Heyətində növbəti dəfə 2018-ci ilin iyun ayının 14-də müzakirə ediləcəkdir. Banklar ən azı bu tarixədək depozit hərraclarından qazanmağa davam edəcəklər.

Banklar vəsaitləri iqtisadiyyata ötürməkdə çətinlik çəkirlər. Belə vəziyyətdə, Mərkəzi Bank bir növ banklara dəstək verir. Banklar vəsaitlərini depozit hərracları vasitəsilə bir neçə günlük Mərkəzi Banka verərək müyyən gəlir əldə edirlər.

Mərkəzi Bank hesab edir ki, kredit ekosistemində bir sıra problemlər var.

"Biz maliyyə vasitəçiliyini bərpa etmək istəyiriksə, faizlərin əhəmiyyətli aşağı düşməsini istəyiriksə, bu ekosistemdə olan problemləri həll etməliyik. Bu məsələ hökumətin fokusundadır. Mən əminəm ki, biz yaxın gələcəkdə bu problemləri həll edəcəyik”, - bu gün keçirilmiş mətbuat konfransında Mərkəzi Bankın sədri Elman Rüstəmov bildirib.