“Azərbaycan Mərkəzi Bankı (AMB) kriptovalyuta problemlərini, “blockchain” texnologiyalarından istifadə problemlərini və bu sahədə tənzimləmə üzrə beynəlxalq təcrübəni diqqətlə izləyir. Kriptovalyuta ilə bağlı AMB-nin mövqeyi konservativdir. Kriptovalyuta valyuta paralel maliyyə monetar sistemi deyil, yüksək riskli investisiya aktividir”.

Bunu AMB sədri Elman Rüstəmov parlamentin bugünkü plenar iclasında çıxışı zamanı bildirib.

Baş bankir qeyd edib ki, "blockchain" - qabaqcıl texnologiyadır:

"Yaxın beşillikdə maliyyə sektoru, real sektor, idarəetmə sistemi də daxil olmaqla, bütün sistemdə dəyişikliklər gətirib çıxaracaq. AMB “blockchain” texnologiyalarının maliyyə-bank sektorunda tətbiqinə yardım edəcək. Bu sahədə artıq aparıcı məsləhətçi şirkətlərlə danışıqlara başlamışıq. İlk olaraq “blockchain”in hüquqi infrastrukturunu yaratmalıyıq, sonra onun texnoloji tətbiqinə keçməliyik".

E.Rüstəmov bildirib ki, sərt xarici şok olmazsa, daxili valyuta bazarında sabitlik qorunacaq:

"Proqnozlaşdırılan neft qiymətləri çərçivəsində tədiyyə balansının cari hesabı tarazlıdır, valyuta bazarında tələb-təklif arasında tarazlığı, manatın məzənnəsinin sabitliyini təmin etmək iqtidarındadır".

Bununla yanaşı qeyd olunub ki, növbəti ildə pul bazarının inkişaf proqramları üzrə tədbirlər aidiyyəti orqanlarla bilrikdə həyata keçiriləcək: “Bank sektorunda restrukturizasiya davam etməlidir. Problemli aktivlər həllini tapmalıdır. Kapitalizasiya tədbirləri davam etdirməlidir”.

XXX

Azərbaycan Mərkəzi Bankının (AMB) kriptovalyutaya münasibətdə mövqeyi mühafizəkar (konservativ) olaraq qalır.

Bunu Mərkəzi Bankın sədri Elman Rüstəmov Milli Məclisin plenar iclasında 2018-ci il büdcə zərfinin müzakirəsi zamanı deyib.

O qeyd edib ki, AMB kriptovalyutaya alternativ ödəniş vasitəsi kimi baxmır:

"Biz hesab edirik ki, kriptovalyutalar investisiya baxımından təhlükəli alət olaraq qalmaqda davam edir".

© Trend, Report