Azərbaycan auditorları haqsız rəqabətdən şikayət edir

Azərbaycan auditorları haqsız rəqabətdən şikayət edir

Azərbaycanda audit bazarında haqsız rəqabət auditorları ciddi narahat edir.

Bu barədə Auditorlar Palatasında keçirilən “Auditorun səsi” adlı onlayn müzakirədə müxtəlif auditor şirkətlərinin təmsilçiləri və sərbəst auditorlar çıxış ediblər.

VTB-də yüksək depozit faizləri daha çox qazandırır

Sərbəst auditor Aygün Səfərova bildirib ki, bir çox auditorlar xidmət müqavilələrini qanunla müəyyən olunmuş minimum qiymət hədlərindən aşağı məbləğlərlə bağlayırlar.

Onun sözlərinə görə, bu vəziyyət bazarda sağlam rəqabətə mane olur və keyfiyyətli audit xidmətlərinin göstərilməsini sual altına alır: “Əgər bütün auditorlar bu qaydalara eyni vaxtda əməl etsələr, sahibkarlar da təqdim etdiyimiz qiymət cədvəlinə uyğunlaşarlar. Amma bəzən bizdən minimum həddi pozmağımız tələb olunur. Mən buna razılaşmıram. Minimum hədlərə əməl etməyən auditorların rəy hüququ ya ləğv olunmalı, ya da fəaliyyətlərinə müvəqqəti xitam verilməlidir.”

Digər auditor Yasin Şirinov bu fikri dəstəkləyərək bildirib ki, çox aşağı qiymətlə aparılan auditin keyfiyyətindən danışmaq mümkün deyil: “Keyfiyyətə nəzarət mexanizmlərinin zəifliyi və cəza tədbirlərinin tətbiq olunmaması problemin uzun müddət həll olunmamasına səbəb olub”

Auditor Lamiyə Bayramova isə deyib ki, minimum hədlərə əməl etməyən auditorların mənfi rəy verdiyi sifarişçilərə digər auditorların əsassız olaraq müsbət rəy verməsi bazarda xaosa səbəb olur: “Bu, haqsız rəqabətə yol açır və mənfi hallara gətirib çıxarır. Palata mənfi rəylər, şərti-müsbət rəylər və rəydən imtina halları üzrə mütəmadi araşdırmalar aparmalı və nəticələrə uyğun tədbirlər görməlidir.”

Palata rəsmiləri qeyd ediblər ki, minimum hədlərə əməl olunmaması məsələsi ciddi nəzarətə götürüləcək və bu istiqamətdə yeni mexanizmlərin tətbiqi nəzərdə tutulur.

09.07.2025 13:29