Ölkənin audit bazarı 15 %-dən çox böyüyüb.

2024-cü ildə Azərbaycandakı auditor təşkilatları və sərbəst auditorlar 153,4 milyon manat məbləğində 7 193 müqavilə bağlayıb.

Auditorlar Palatasına istinadən xəbər verilir ki, bu, 2023-cü illə müqayisədə müvafiq olaraq 15,2 % çox və 0,5 % azdır.

Beləliklə, ötən il audit bazarında 1 müqavilənin dəyəri orta hesabla 21,3 min manat təşkil edib ki, bu da əvvəlki ilə nisbətən 15,8 % çoxdur.

Hesabat dövründə bağlanmış müqavilələrdə Böyük 4-lüyün (“Deloitte”, “PricewaterhouseCoopers”, “Ernst & Young” və KPMG) payı məbləğ olaraq 64,1 %, say olaraq isə 15,1 % olub. Bunlar isə illik müqayisədə müvafiq olaraq 4,8 faiz bəndi və 1,3 faiz bəndi çoxdur.

2024-cü il ərzində bağlanmış müqavilələrdən 117,9 milyon manat məbləğində 6 353-ü yerinə yetirilib. Bunlar, 2023-cü illə müqayisədə müvafiq olaraq 23,8 % və 0,7 % azdır.

Beləliklə, ötən il audit bazarında yerinə yetirilmiş 1 müqavilənin dəyəri orta hesabla 18,5 min manat təşkil edib ki, bu da əvvəlki ilə nisbətən 24,2 % çoxdur.

Azərbaycanda ötən il MMC-lərin 41 %-i auditdən keçməyib

2024-cü ildə Azərbaycanda 3 368 məhdud məsuliyyətli cəmiyyət (MMC) məcburi audit subyekti olub. Bu, 2023-cü illə müqayisədə 17,7 % çoxdur.

Ötən il auditdən keçmiş MMC-lərin sayı isə 2,2 % artaraq 1 984-ə, onların xüsusi çəkisi isə 68 %-dən 58,9 %-ə düşüb. Başqa sözlə, il ərzində MMC-lərin 41,1 %-i auditdən keçməyib.

Azərbaycanda ötən il səhmdar cəmiyyətlərinin 15%-dən çoxu auditdən keçməyib

2024-cü ildə Azərbaycanda 403 səhmdar cəmiyyəti (SC) məcburi audit subyekti olub. Bu, 2023-cü illə müqayisədə 6,9 % çoxdur.

Ötən il auditdən keçmiş SC-lərin sayı isə 59,3 % artaraq 341-ə, onların xüsusi çəkisi isə 57 %-dən 84,6 %-ə yüksəlib. Başqa sözlə, il ərzində SC-lərin 15,4 %-i auditdən keçməyib.

Azərbaycanda məcburi audit subyektlərinin sayı 10 % artıb

2024-cü ildə Azərbaycanda 5 432 məcburi audit subyekti olub. Bu, 2023-cü illə müqayisədə 10 % çoxdur.

Bununla belə, ötən il auditdən keçmiş qurumların sayı 7,2 % artaraq 3 176-ya çatıb, onların xüsusi çəkisi isə 60 %-dən 58,5 %-ə düşüb.

“Report”