Avropa Statistika İdarəsinin (Eurostat) məlumatına görə, Avropa İttifaqı ölkələrində kərə yağının qiymətləri 2025-ci ilin fevral ayında 2024-cü ilin fevral ayı ilə müqayisədə orta hesabla 30 faiz artıb. Federal Statistika İdarəsinin (Destatis) məlumatına görə, Avropada ən çox əhalisi olan Almaniyada kərə yağının istehsalçı qiyməti yanvar ayında illik müqayisədə 39,8 faiz artıb.

Marja.az-ın məlumatına görə, bundan əlavə, kərə yağı Avropada 250 qramlıq qablaşdırmada satıldığı üçün istehlakçılar geniş istifadə olunan bu məhsulu tez-tez almalı və qiymət dəyişikliyini daha çox hiss etməli olurlar. Bu vəziyyət inflyasiyanı aşağı salmağa yönəlmiş siyasətləri sarsıdır.

Supermarketlər kərə yağı satışına məhdudiyyət tətbiq edir

Qitədə istehlakçılar kərə yağı üçün tarixdə ən yüksək qiyməti ödəyirlər. Bir çox supermarketlər hər müştəriyə dörd qutudan çox (hər biri 250 qram)  kərə yağı satmır. Bundan əlavə, bəzi supermarketlərdə kərə yağı, kürü kimi bahalı məhsulların olduğu xüsusi mühafizə olunan rəflərdə saxlanılır.

Polşa qiymətləri aşağı salmaq üçün dondurulmuş kərə yağı ehtiyatlarını satır

Almaniyanın qonşusu Polşada kərə yağının qiyməti siyasi gündəmdədir. Ölkədə kərə yağı lüks məhsula çevrildiyindən hökumət təcili tədbirlərə əl atıb. 2025-ci ilin mayında keçiriləcək prezident seçkiləri ərəfəsində artan qiymətləri kompensasiya etmək üçün Polşa hökuməti 2024-cü ilin dekabrında 1102 ton strateji kərə yağı ehtiyatını satacağını açıqlayıb. Polşa Strateji Ehtiyatlar Agentliyi, həmçinin duzsuz dondurulmuş kərə yağının kiloqramı 7 dollardan bizneslərə satılacağını bildirib.

Xərclər artır, istehsal azalır

Avropadakı fermerlər bahalı xammal və enerji, aşağı süd qiymətləri və yüksək nəqliyyat xərcləri ilə mübarizə aparır və bunun kərə yağı istehsalında qıtlığa səbəb olduğu bildirilir.

Bundan əlavə, son illərdə bütün Avropada qatılaşdırılmış yemdən (konsentratlı yemdən) istifadənin artması ilə südün yağ tərkibinin normadan aşağı düşməsi səbəbindən də yağ istehsalının azaldığı bildirilir.

Keçən il Avropa İttifaqında inəklərin sayı 20 milyondan aşağı düşərkən, Hollandiya və İrlandiya kimi əsas süd və yağ sənayesi olan ölkələrdə kənd təsərrüfatı siyasəti ilə bağlı şiddətli müzakirələr gedir.

Hökumətlərin iqlim siyasəti və artan xərclər səbəbindən Avropada fermerlərin etirazları artır.