Dünən Almaniyada və ABŞ-da dərc olunmuş statistik məlumatların fonunda dollar major valyutalar qarşısında bahalaşdı. Ötən gün ərzində EUR/USD valyuta cütlüyündə 1.1139 səviyyəsindən 1.1056 səviyyəsinə qədər eniş müşahidə olunub. Hal-hazırda avro/dollar məzənnəsi 1.1075 səviyyəsində ticarət olunur. GBP/USD və USD/JPY cütlükləri müvafiq olaraq 1.3165 və 144.830 səviyyələrində qərarlaşıblarlar. 

Almaniyada, ilkin hesablamalara görə, avqustun sonunda illik inflyasiya öncəki ay ilə müqayisədə 2.3%-dən 1.9%-ə qədər enib. Analitiklər avqust ayında istehlak qiymətlərinin 2.1% artdığını proqnozlaşdırmışdılar. Aylıq ifadədə Almaniyada istehlak qiymətləri, ilkin məlumatlara görə, 0.1% azalıb.

ABŞ-da isə avqustun 24-də başa çatan həftə ərzində İşsizlik Müavinəti üçün Müraciətlərin Sayı əvvəlki həftənin yenilənmiş nəticələri ilə müqayisədə 2 min nəfər azalaraq 231 min nəfər təşkil edib. Analitiklər göstəricinin əvvəlki həftənin ilkin nəticəsi, 232 min nəfər səviyyəsində qalacağını proqnozlaşdırmışdılar. Həmçinin, ABŞ-da, ikinci aralıq hesablamaya görə, rüblük ifadədə ölkə ÜDM-i ikinci rübdə 3% artıb.

Bugün Almaniyada, Avrozonada və ABŞ-da aşıqlanacaq göstəricilər bazar iştirakşılarının diqqət mərkəzində olacaq. Belə ki, analitiklərin fikrincə, Avrozonada illik inflyasiya, ilkin hesablamalara görə, iyul ayı ilə müqayisədə avqust ayında 2.6%-dən 2.2%-ə qədər enib. Rəsmi məlumatlar “Eurostat” statistika agentliyi tərəfindən Bakı vaxtı ilə saat 13:00-da dərc olunacaq.

Eyni zamanda, “Eurostat” birlik ölkələrində işsizliklə bağlı məlumatları açıqlayacaq. Analitiklər ehtimal edirlər ki, göstərici iyun ayında olduğu kimi, iyul ayında da 6.5% səviyyəsində olacaq.

Bakı vaxtı ilə saat 11:55-də Almaniya Federal Məşğulluq Agentliyi ölkədə avqust ayı üçün işsizlik ilə bağlı məlumatları dərc edəcək. Analitiklər hesab edirlər ki, göstərici 6% səviyyəsində qalıb.

Eləcə də, bugün ABŞ-ın Ticarət Departamentinin İqtisadi Təhlil Bürosu ev təsərrüfatlarının gəlirləri və xərcləri haqqında məlumatları dərc edəcək. Mütəxəssislər ölkə əhalisinin iyulda gəlirlərinin iyunda olduğu kimi 0.2% artdığını, xərclərin isə əvvəlki ay ilə müqayisədə 0.3%-dən 0.5%-ə qədər yüksəldiyini proqnoz edirlər.

Məlumat İnvest-AZ İnvestisiya Şirkətinin analitikləri tərəfindən hazırlanıb.