“AFB Bank” ASC 2023-cü ilin sonuna aktivlərini 328.71 mln. manata çatdırıb və son dörd ay üzrə göstəricilərindən məlum olur ki, bankın aktivlərində gəlirli olan hissə artmaqdadır.

Banker.az bankın kənar audit tərəfindən təsdiqlənən hesabatına istinadən xəbər verir ki, bu da son bir ildə 17 faizlik artım deməkdir. Kommersiya bankının aktivlərinin həcmi ötən ilin əvvəli 280.53 mln. manat idi.

Bank bu müddət ərzində müştərilərə verdiyi xalis kreditlərinin həcmini 162.35 mln. manata yüksəldib ki, ilin əvvəlində bu rəqəmin 151.06 mln. manat olduğunu nəzərə alsaq, bu da bankın son ildə 7 faizlik yüksəliş dinamikasına nail olması deməkdir.

Hesabata əsasən, “AFB Bank” müştərilərdən cəlb etdiyi əmanətləri il ərzində 124.78 mln. manatdan 169.4 mln. manata yüksəldib ki, bu da illik müqayisədə 36 faiz artımdır.

Bankın xalis faiz gəliri son illik müqayisədə 24 faiz artımla 14.04 mln. manata yüksəlib. Xalis faiz gəliri dedikdə cəmi faiz gəlirləri ilə cəmi faiz xərcləri arasındakı fərq nəzərdə tutulur.

Bankın idarəetmə hesabatına əsasən isə, o, ötən il bir sıra uğurlu layihələrdə iştirak edib. Bura kartlarında “Apple Pay” və “Google Pay”in tətbiqi, “VİSA Prinsipal”a üzvlük, “VİSA Acquiring” lisenziyasının, “MasterCard Cross Border”, POS-terminalların HÖP-ə inteqrasiyası” və Ehtiyyat Mərkəzinin yenilənməsinin layihələrini aid etmək olur.

Hesabat müddətində bankın tarixinə yazılan digər uğurlu hadisə isə “Google Pay”də ən qısa zamanda inteqrasiya edən bank və eləcə də “Apple Pay”da 100% səhvsiz nəticə ilə dünyada ilk sıralara adını yazdırması olub.

Bəs 2024-cü ilə necə başladı?

“AFB Bank” son bir ildə kredit portfelində mühüm irəliləyişə nail ola bilib. 2023-cü ilin ilk 4 ayın sonuna 166.11 mln. manat olan kredit portfelinin həcmi cari ilin eyni dövründə 177.07 mln. manatı  adlayıb. Bu, onun son bir ildə əsas fəaliyyət istiqaməti – müştərilərə verilən kreditləri 7 faiz artırması anlamına gəlir.

Bankdakı müddətli hesabların həcmi də son bir ildə 13 faiz artaraq 1 may 2024-cü il tarixinə 34.75 mln. manata yüksəlib. Bankda cari hesabların həcmi isə 84.29 mln. manatdır.

Bankdan verilən məlumatda qeyd edilir ki, ilin ilk dörd ayında onun mənfəəti 2.2 mln. manatdır.

Bankın aktivlərində digər diqqət çəkən məqam gəlirli olan hissənin cəmi akitvlərdəki payının son bir ildə 74.8 faizdən 78.3 faizə və kredit portfelinin aktivlərdəki payının 57.4 faizdən 63.2 faizə qədər artmasıdır ki, bu da növbəti illərdə onun gəlirliliyinin formalaşmasında mühüm müsbət təsir edəcək.