ABŞ Energetika Nazirliyi 2024-cü ildə Brent markalı neftin qiyməti ilə bağlı proqnozunu azaldaraq bir barel üçün 82,49 dollardan 82,42 dollara endirib.

Marja.az xəbər verir ki, bu barədə ABŞ Energetika Nazirliyinin Enerji İnformasiya Administrasiyasının hesabatında deyilir.

2025-ci ildə Brent markalı neftin qiymətinin 79,48 dollar/barel olacağı gözlənilir (əvvəlki proqnoz - 79 dollar/barel).

2024-cü il üçün WTI markalı neftin orta qiyməti ilə bağlı proqnoz əvvəlki 77,99 dollardan 77,68 dollara endirilib, 2025-ci il üzrə isə dəyişməyərək 74,98 dollar olub.

Nazirlik bildirib ki, Qırmızı dənizdə gəmilərə edilən hücumlar fonunda neft tədarükü ilə bağlı qeyri-müəyyənlik səbəbindən Brent markalı neftin qiyməti yanvarda 2 dollar/barel artaraq orta hesabla 80 dollar/barel olub. 

ABŞ Energetika Nazirliyi qarşıdakı aylarda neft qiymətlərinin artacağını gözləsə də, ikinci rübdə qlobal ehtiyatların artması və tələbin azalması səbəblərindən qiymətlərə təzyiqlər gözləyir.

“Lakin, Yaxın Şərqdə tədarükün pozulması riskləri qalmaqdadır və buna görə də neft qiymətlərinin bizim proqnozumuzu aşması ehtimalı da var”, - deyə hesabatda qeyd olunub.

Nazirlik qeyd edib ki, OPEC+ın hasilatın azaldılması tədbiri fevral-mart aylarında qlobal neft ehtiyatlarının azalmasına səbəb olacaq. Hesabatda deyilir: “2024-cü ilin sonuna qədər nisbətən balanslaşdırılmış bazarlar dövründən sonra biz neft tələbinin yavaşlaması nəticəsində, 2025-ci ildə bazarın mülayim ehtiyat yığılmasına tədricən qayıtmasını proqnozlaşdırırıq”. 

ABŞ Energetika Nazirliyi ölkədə 2024-cü ildə orta neft hasilatı proqnozunu gündəlik 100 min barel artıraraq 13,21 milyon barrelə yüksəldib, həmçinin 2025-ci il üçün proqnozu gündəlik 13,44 milyon barel səviyyəsində müəyyənləşdirib.

ABŞ-ın 2023-cü ildə neft hasilatı gündəlik 12,93 milyon barel səviyyəsində qiymətləndirilir.

ABŞ Energetika Nazirliyi 2024-cü il üçün qlobal neft tələbi ilə bağlı proqnozunu gündəlik 40 min barel azaldaraq 102,42 milyon barrelə, 2023-cü il üçün isə 101 milyon barrelə endirib.

Hesabata əsasən, 2023-cü ildə neftə tələbat gündəlik 101 milyon barel, 2024-cü ildə isə istehlak proqnozu 102,42 milyon barel səviyyəsində qiymətləndirilir. Belə ki, ABŞ Energetika Nazirliyi 2023-cü ildə tələbatın ötən ayla müqayisədə gündəlik 70 min barel, 2024-cü ildə isə gündəlik 40 min barel az olacağını təxmin edir.