Avropa Yenidənqurma və İnkişaf Bankı (AYİB) dövlətə məxsus Azərbaycan Xəzər Dəniz Gəmiçilik şirkətinə (ASCO) 42 milyon ABŞ dolları (38,71 milyon avro) məbləğində kredit ayırıb.

Marja.az-ın əldə etdiyi məlumata görə, ASCO bu vəsaiti beynəlxalq sularda quru yüklərin daşınması və ticarət donanmasının fəaliyyətini genişləndirmək üçün 2 ədəd “Handysize” tipli quru yük gəmisinin alışına sərf edəcək. Məqsəd regional dəniz əlaqələrinin və ticarətinin gücləndirilməsinə dəstək verməkdir.

Bildirilir ki, yeni gəmilər Mərkəzi Asiya və Cənubi Qafqazı qlobal bazarlarla birləşdirən genişləndirilmiş Orta Dəhliz boyunca Azərbaycanın həlledici halqa kimi ölkə mövqeyini möhkəmləndirməyə dəstək olacaq.

AYİB həmçinin gəmiçilik sektorunda dekarbonizasiya problemlərini daha yaxşı həll etmək və ASCO-nun dayanıqlılıqla əlaqəli ilk maliyyələşmə alətlərinə yol açmaq üçün şirkətin iqlim yönümlü korporativ idarəçiliyini və iqlimlə əlaqəli açıqlama siyasətlərini təkmilləşdirməkdə ona dəstək verəcək.   

ASCO regionun ən böyük gəmiçilik şirkətlərindən biri olaraq bu mühüm ticarət marşrutu boyunca dəniz əlaqələrinin gücləndirilməsində mühüm rol oynayır.

"Avropa Yenidənqurma və İnkişaf Bankı (AYİB) ilə ölkəmizin uğurlu əməkdaşlığı çərçivəsində AYİB və "Azərbaycan Xəzər Dəniz Gəmiçiliyi" QSC arasında Kredit Sazişi imzalandı. Sənədin icrası regional kommunikasiyaların və ticarət əlaqələrinin gücləndirilməsinə, tranzit yüklərinin daşınmasının artırılmasına və marşrut istiqamətlərini şaxələndirməklə rəqabətqabiliyyətliliyin yüksəlməsinə töhfələr verəcək",- Azərbaycanın İqtisadiyyat naziri Mikayıl Cabbarov bildirib.

AYİB Qafqaz və Mərkəzi Asiyada mühüm institusional investordur. Bank Azərbaycanda ölkə iqtisadiyyatının şaxələndirilməsini dəstəkləmək üçün 189 layihəyə 3,6 milyard avrodan çox sərmayə yatırıb.

Qeyd edək ki, 2023-cü ilin əvvəlində ASCO daxili bazarda istiqraz buraxılışı yolu ilə 100 milyon dollar borc alıb. Dövlət şirkəti əlavə 50 milyon dollar cəlb etmək üçün də istiqrazlar buraxıb və hazırda həmin istiqrazlara abunə yazılışı davam edir. Cəlb edilən vəsait tankerlərin alınmasına sərf olunur.