"AFB Bank" ASC 2023-cü il üzrə maliyyə göstəricilərini açlıqlayıb.

Marja.az xəbər verir ki, "AFB Bank" ASC 2023-cü ili 7 milyon 652 min manat xalis mənfəət ilə başa vurub. Bank 2022-ci ili 10 milyon 884 min manat xalis mənfəət ilə bağlamışdı. Xalis mənfəətin azalması qeyri-faiz gəlirlərinin düşməsi və cəmi xərclərin artmasından qaynaqlanır.

Ötən il "AFB Bank"ın faiz gəlirləri 21,5% arataraq 22 milyon 168 min manat, qeyri-faiz gəlirləri isə 28% azalaraq 8 milyon 164 min manat təşkil edib. 

2023-cü ildə "AFB Bank"ın cəmi əməliyyat gəlirləri (faiz və qeyri-faiz gəlirləri) 30 milyon 332 min manat (2022-ci ildə 29 milyon 646 min manat) cəmi əməliyyat xərcləri (faiz və qeyri-faiz xərcləri) 23 milyon 733 min manat (2022-ci ildə 19 milyon 956 min manat), gəlirlər xərcləri üstələdiyindən əməliyyat mənfəəti 6 milyon 599 min manat (2022-ci ildə 9 milyon 690 min manat) təşkil edib. Mümkün zərərlər üçün yaradılan məqsədli ehtiyatlardan qayıdan 3 milyon 528 min manatın hesabına Bankın mənfəəti 10 milyon 127 min manata yüksəlib. "AFB Bank" ötən il 2 milyon 475 min manat mənfəət vergisi ödəyib. 

2023-cü ildə "AFB Bank"ın cəmi gəlirləri 676 min manat, cəmi xərcləri isə 3 milyon 777 min manat artıb. Xərclər gəlirlərdən daha çox artdığı üçün Bankın əməliyyat mənfəəti azalıb.

BANK BÖYÜYÜB, MÜŞTƏRİLƏRƏ VERİLMİŞ KREDİTLƏR ARTIB

2023-cü ildə "AFB Bank"ın cəmi aktivləri 48 milyon 286 min manat və ya 17,1% artaraq 31 dekabr 2023-cü il tarixində 330 milyon 668 min manat təşkil edib.

Ötən il "AFB Bank"ın cəmi kredit portfeli (müştərilərə verilmiş  kreditlər) 9 milyon 196 min manat və ya 5,4% artaraq 180 milyon 50 min manata yüksəlib. O cümlədən, istehlak kreditləri portfeli 2 milyon 927 min manat artaraq 22 milyon 7 min manata, ipoteka kreditləri portfeli 11 milyon 717 min manat artaraq 61 milyon 818 min manata yüksəlib, biznes kreditləri portfeli isə 5 milyon 448 min manat azalaraq 96 milyon 225 min manata geriləyib. 

BANKDA DEPOZİTLƏR ARTIB

Ötən il "AFB Bank"da depozitlər 52 milyon 88 min manat və ya 44,8% artaraq 168 milyon 256 min manata yüksəlib. O cümlədən, fiziki şəxslərin depozitləri 43 milyon 426 min manat artaraq 73 milyon 245 min manata, hüquqi şəxslərin depozitləri 8 milyon 662 min manat artaraq 95 miylon 11 min manata yüksəlib. 

31 dekabr 2023-cü il tarixində "AFB Bank" ASC 78 milyon 863 min manat məcmu kapitala malik olub. Bank 2022-ci ilin sonunda 82 milyon 459 min manat məcmu kapitala malik idi.