"Bank Avrasiya" ASC 2023-cü ili 6 milyon 622 min manat xalis mənfəət ilə başa vurub. Bank 2022-ci ili 1 milyon 815 min manat xalis mənfəətlə bağlamışdı. Beləliklə, "Bank Avrasiya"nın xalis mənfəəti 2023-cü ildə 2022-ci illə müqayisədə 4 milyon 807 min manat və ya 3,6 dəfə artıb. Xalis mənfəətin artması həm gəlirlərin artmasından, həm də mümkün zərərlər üçün yaradılan məqsədli ehtiyatlardan qayıdan vəsaitdən qaynaqlanır.

Marja.az xəbər verir ki, 2023-cü ildə "Bank Avrasiya"nın cəmi əməliyyat gəlirləri (faiz və qeyri-faiz gəlirləri) 18 milyon 588 min manat, cəmi əməliyyat xərcləri (faiz və qeyri-faiz xərcləri) 11 milyon 635 min manat, gəlirlər xərcləri üstələdiyindən əməliyyat mənfəəti 6 milyon 953 min manat təşkil edib. Həmçinin, mümkün zərərlər üçün yaradılan məqsədli ehtiyatlardan azad olan 1 milyon 789 min manat mənfəətə əlavə olunub və mənfəət 8 milyon 741 min manata yüksəlib. Bank mənfəət vergisindən əvvəlki mənfəətindən 2 milyon 120 min manat mənfəət vergisi ödəyib. 

Müqayisə üçün qeyd edək ki, 2022-ci ildə cəmi əməliyyat gəlirləri 15 milyon 525 min manat, cəmi əməliyyat xərcləri 8 milyon 223 min manat, əməliyyat mənfəəti 7 milyon 302 min manat təşkil etmişdi. Bank mümkün zərərlər üçün yaradılan məqsədli ehtiyatlara 4 milyon 901 min manat ayırdığından və 586 min manat mənfəət vergisi ödiyindən 2022-ci ili 1 milyon 815 min manat xalis mənfəətlə bağlamışdı.

BANKIN AKTİVLƏRİ 21,5% AZALIB

31 dekabr 2023-cü il tarixində "Bank Avrasiya" 184 milyon 537 min manat cəmi aktivlərə malik olub. Bank 2022-ciilin sonunda 224 milyon 268 min manat cəmi aktivlərə malik idi. "Bank Avrasiya" aktivlərinin həcminə görə kiçik banklardan biridir.

Ötən il "Bank Avrasiya"nın kredit portfeli (müştərilərə verilən kreditlər) 11 milyon 817 və ya 9,4% artaraq 137 milyon 169 min manata çatıb. O cümlədən, Bankın istehlak kreditləri portfeli 6 milyon 598 min manat artaraq 15 milyon 474 min manata, ipoteka kreditləri portfeli 6 milyon 565 min manat artaraq 56 milyon 139 min manata yüksəlib, biznes kreditləri portfeli isə 687 min manat azalaraq 66 milyon 214 min manata düşüb. 

Ötən il Bankın qiymətli kağızlara sərmayələri,  digər banklar və maliyyə institutlarındakı depozitləri azalıb.

DEPOZİT PORTFELİ KİÇİLİB

Ötən il "Bank Avrasiya"da depozitlər 31 milyon 215 min manat və ya 39,2% azalaraq 48 milyon 484 min manata geriləyib. O cümlədən fiziki şəxslərin depozitləri 24 milyon 622 min manat, hüquqi şəxslərin depozitləri 6 milyon 594 min manat azalıb.

31 dekabr 2023-cü il tarixində "Bank Avrasiya" 79 milyon 216 min manat məcmu kapitala malik olub.