Yanvarın 9-da Bakıda “Azərbaycan Maliyyə Forumu: Nailiyyətlər və Çağırışlar” adlı genişmiqyaslı tədbir keçirilib.

Azərbaycan Banklar Assosiasiyası, Azərbaycan Mikromaliyyə Assosiasiyası, Azərbaycan Sığortaçılar Assosiasiyası, Azərbaycan Fintex Assosiasiyası və Azərbaycan Fond Bazarı İştirakçılarının Assosiasiyası tərəfindən təşkil olunan tədbirdə maliyyə sektorunun, biznes və ictimai təşkilatlarının rəhbərləri bir araya gəliblər.

Forum çərçivəsində innovativ texnologiyaların tətbiqi ilə rəqəmsallaşmanın sürətləndirilməsi imkanları, bu əsasda ötən dövr ərzində Azərbaycan maliyyə sektorunun əldə etdiyi nailiyyətlər və qarşıda duran çağırışlar müzakirə edilib. Bundan başqa, iqtisadiyyatın inkişafı ilə maliyyə sektorunun potensialının uzlaşdırılması, maliyyə vasitəçiliyinin və maliyyə inklüzivliyinin gücləndirilməsi, bu sahədəki maneələrin aradan qaldırılmasına dair mövzular ətrafında müzakirələr aparılıb.

Tədbirin panel sessiyalarında ümumi bank sektoru üzrə çağırışlar, bankçılıqda 2023-cü il üzrə nailiyyətlər, Fintex sahəsində yeni dövrün gətirdiyi imkanlar, investisiyaların cəlb edilməsinin genişlənməsi, kiçik və orta sahibkarlığın maliyyələşməsində yeni imkanlar və sığorta bazarının inkişaf perspektivlərinə dair fikir mübadiləsi aparılıb.

Forumda spiker qismində çıxış edən “PAŞA Bank”ın idarə heyəti sədrinin müavini Bəhruz Nağıyev korporativ bankçılıqda əldə olunan nailiyyətlər və bu seqmentin perspektivləri haqqında fikirlərini bölüşüb. O, 2023-cü ildə ölkə iqtisadiyyatında, xüsusilə qeyri-neft sektorunda əldə olunan nailiyyətləri qeyd edərək, onların ümumi korporativ bankçılığın inkişafında rolunu vurğulayıb.

“2022-ci ildə qeyri-neft sektorunda ÜDM 69 mlrd. manat təşkil edib, lakin 2023-cü ildə bu rəqəm 77 mlrd. manat səviyyəsində gözlənilir. Bu göstəricinin artmasına fəal inkişaf edən qeyri-neft seqmentlərinin - kənd təsərrüfatı, turizm, tikinti və digər sektorların töhfəsi qeyd edilə bilər. Eyni müddət ərzində ölkədə korporativ və KOS seqmentinə ayrılan biznes kredit portfeli 1,4 mlrd. manat artaraq, mühüm bir rəqəmə - 12,4 mlrd. manata çatıb. PAŞA Bank sistem əhəmiyyətli bank olaraq, bu artımın təqribən 20%-ni təmin edib, bununla da biznes kreditləri portfelinin 300 mln. manat artmasına nail olub”, - deyə, “PAŞA Bank”ın idarə heyəti sədrinin müavini B. Nağıyev vurğulayıb.