"OPEC+ razılaşması iflasa uğrasa, neftin qiyməti dərhal 50-60 dollar/barel dəhlizinə düşəcək. Bu da sənayenin investisiya cəlbediciliyini əhəmiyyətli dərəcədə azaldacaq və neft ixrac edən ölkələrə mənfi təsir göstərəcək".

Marja.az xəbər verir ki, bunu Energetika və Maliyyə İnstitutunun (IEF) direktoru Aleksey Qromov bildirib. 

“Əgər biz OPEC+ın fəaliyyətini dayandırdığını təsəvvür etsək, o zaman biz çox kəskin şəkildə 2020-ci ilin əvvəlindəki vəziyyətə qayıda bilərik. O zaman neft hasilatı və dünya bazarlarına tədarükü sahəsində heç bir məhdudiyyətlər olmadığından razılaşdırılmamış hərəkətlər, bütün neft istehsalçıları arasında qiymət müharibəsi başladı. OPEC+ olmasa, biz dünya bazarında neft qiymətlərinin xeyli aşağı düşdüyü şəraitdə yaşayacağıq. Bu, indiki 75-80 dollar/barel dəhlizi olmayacaq, 50-60 dollar dəhlizində qiymətlər olacaq", - Qromov əlavə edib.

Ekspert qeyd edib ki, dünya neft qiymətlərinin 100 dollara çatdırılması da təhlükəlidir, çünki bu, idxalçılar tərəfindən neftdən sürətlə imtinaya təkan verəcək:

"Neft istehsalçıları üçün qiymətləri investisiya cəlbedici dəhlizdə saxlamaq vacibdir. Bu, yəqin ki, bu gün bir barel üçün 75-90 dollardır. Bu, neft istehsalçıları üçün yaxşı dəhlizdir və yeri gəlmişkən, neft idxal edən ölkələr üçün də məqbuldur".

2023-cü ildə OPEC+ hasilatı 2022-ci ilin avqust ayı səviyyəsindən gündəlik 2 milyon barel azaldıb. İyun ayında alyans 2024-cü ildən neft hasilatının hədəf səviyyəsini daha 1,4 milyon barel azaldacağını açıqlamışdı. Həmçinin, 2024-cü ilin sonuna qədər Rusiya və Səudiyyə Ərəbistanı da daxil olmaqla bir sıra OPEC+ ölkələri gündəlik kvotaları 1,66 milyon barel azaldacaq. İyul ayından etibarən Ər-Riyad könüllü olaraq daha 1 milyon barel hasilatı azaldıb, Rusiya isə avqust ayından neft ixracını 500 min barellə, sentyabrdan dekabr ayına qədər isə 300 min barellə məhdudlaşdırıb.