2023-cü ilin yanvar-oktyabr aylarında Rusiya ilə Çin arasında ticarət dövriyyəsi illik müqayisədə 27,7% artaraq 196,48 milyard dollara çatıb.

Marja.az-ın məlumatına görə, bu barədə Çin Xalq Respublikasının Baş Gömrük İdarəsi məlumat yayıb.

Açıqlanan məlumatlara əsasən, 10 ay ərzində Çindən Rusiya Federasiyasına ixrac 52,2% artaraq 90,08 milyard dollara yaxın, Rusiya mallarının idxalı isə 12,4% artaraq 106,4 milyard dollar təşkil edib.  Beləliklə, hesabat dövründə Rusiyanın müsbət saldosu 2022-ci ilin eyni dövrü ilə müqayisədə təxminən 53% azalaraq 16,32 milyard dollar təşkil edib.

Təkcə oktyabrda iki ölkə arasında ticarət dövriyyəsinin həcmi sentyabr ayı ilə müqayisədə 9% azalaraq 19,79 milyard dollar olub. Rusiyadan idxal aylıq olaraq 3,7% azalaraq 11,1 milyard dollara, Çinin Rusiyaya ixracı isə 10,2% azalaraq 8,69 milyard dollara düşüb.

Çin ən çox Rusiyadan neft, təbii qaz, kömür, mis,mis filizi, ağac, yanacaq və dəniz məhsulları alır. Rusiya Çindən isə əsasən smartfonlar, sənaye və ixtisaslaşdırılmış avadanlıqlar, oyuncaqlar, ayaqqabılar, nəqliyyat vasitələri, kondisionerlər və kompüterlər alır.

Rusiya ilə Çin arasında ticarət dövriyyəsi 2021-ci ildə 35,8% artaraq 146,88 milyard dollara, 2022-ci ildə isə 29,3% artaraq rekord məbləğə - 190 milyard dollara çatıb. Oktyabrda Rusiyanın iqtisadi inkişaf naziri Maksim Reşetnikov bildirib, Rusiya-Çin arasında ticarət sürətlə böyüyür və 2023-cü ildə 215-220 milyard dollara çata bilər. 

Çin-ABŞ ticarəti 13,2% azalıb

Çin Xalq Respublikasının Baş Gömrük İdarəsinin məlumatına görə, yanvar-oktyabr aylarında Çin və ABŞ arasında ticarət illik müqayisədə 13,2% azalaraq 550,77 milyard dollar təşkil edib. Açıqlanan məlumatlara görə, Çinin ABŞ-a ixracı 15,4% azalaraq 415,03 milyard dollara, Amerika məhsullarının idxalı isə 5,8% azalaraq 135,74 milyard dollara düşüb.

Çinin ABŞ ilə ticarət profisiti 10 ayda keçən ilin eyni dövrü ilə müqayisədə təxminən 20% azalaraq 279,29 milyard dollara geriləyib.

Təkcə oktyabrda Çin və ABŞ arasında ticarət dövriyyəsinin həcmi sentyabr ayı ilə müqayisədə 5,6% azalaraq 55,51 milyard dollar təşkil edib. Çin ixracatı 6,1% azalaraq 43,17 milyard dollara, ABŞ-dan idxal isə aylıq 3,8% azalaraq 12,34 milyard dollara düşüb.

ABŞ-ın Çinə ixrac etdiyi əsas məhsullara soya, mikroçiplər, mayeləşdirilmiş neft qazı və neft, kokslaşan kömür, yolsuzluq avtomobilləri, pambıq və qarğıdalı, mis və mis filizi daxildir. Amerika tərəfi Çindən smartfonlar, xüsusi avadanlıqlar, kompüterlər, litium-ion akkumulyatorlar, plastik məhsullar, təhlükəsizlik kameraları, məişət texnikası, ayaqqabı və uşaq oyuncaqlarını aktiv şəkildə alır.

Son illərdə Çin və ABŞ arasında gərginliyin artması müşahidə olunur ki, bu da iki ölkə arasında iqtisadi əməkdaşlığa mənfi təsir göstərir. 2021-ci ildə Çin-Amerika ticarət dövriyyəsi 28,7% artaraq 755,64 milyard dollara, 2022-ci ildə isə 0,6% artaraq 759,4 milyard dollara çatmışdı.