Dünya Bankı 2024-cü ildə neftin qiymətini proqnozlaşdırıb

Dünya Bankı neftin qiymətinin 2024-cü ildə bir barel üçün 81 dollara düşəcəyini gözləyir

Dünya Bankı 2024-cü ildə neftin qiymətini proqnozlaşdırıb

Dünya Bankının analitikləri 2023-cü ilin 4-cü rübündə bir barel neftin orta qiymətinin 90 dollar/barel olacağını, 2024-cü ildə isə 81 dollar/barelə enəcəyini proqnozlaşdırırlar.

Marja.az xəbər verir ki, onlar buna əsas olaraq qlobal iqtisadiyyatın yavaşlamasını və buna görə də tələbatın azalmasını göstərirlər.

Eyni zamanda, Dünya Bankı xəbərdarlıq edir ki, Yaxın Şərqdə münaqişənin kəskinləşməsi qiymətləri xeyli yüksək səviyyələrə çatdıra bilər.

Dünya Bankı Oktyabr ayı Əmtəə Bazarı üzrə Proqnozar hesabatında qeyd edib ki, İsrail və HƏMAS arasında qarşıdurma başlayandan bəri neft qiymətləri 6% artıb, kənd təsərrüfatı xammalının, əksər metalların və digər malların qiymətləri isə dəyişib.

Dünya Bankının analitikləri 1970-ci illərdən bəri regional münaqişələrin təcrübəsinə əsaslanaraq mümkün inkişafın 3 ssenarisini müəyyən ediblər.

Kiçik böhran ssenarisi (2011-ci ildə Liviyada vətəndaş müharibəsi zamanı olduğu kimi) neft hasilatının gündəlik 0,5-2 milyon barel azaldılmasını və 4-cü rübdə neftin qiymətinin bir barel üçün 93-102 dollara yüksəlməsini nəzərdə tutur.

Orta ölçülü böhran ssenarisi (2003-cü il İraq müharibəsi kimi) qlobal neft tədarükünün gündə 3-5 milyon barel azalması ilə nəticələnəcək ki, bu da neftin qiymətini bir barel üçün 109-121 dollara çatdıracaq.

Böyük böhran ssenarisi (ərəb ölkələrinin 1973-cü ildə tətbiq etdiyi embarqoda olduğu kimi) tədarükün gündəlik 6-8 milyon barel azalmasını və qiymətlərin bir barel üçün 140-157 dollara yüksəlməsini nəzərdə tutur.

Dünya Bankının baş iqtisadçısının müavini Ayhan Köse, "Neft qiymətlərinin artması, davamlı olarsa, qaçılmaz olaraq ərzaq qiymətlərinin qalxması deməkdir. Neft qiymətlərində ciddi bir şok olarsa, bu, ərzaq qiymətlərinin inflyasiyasını daha da artıracaq", - bildirib.

30.10.2023 20:52