"ABB" ASC (Azərbaycan Beynəlxalq Bankı) 30 iyun 2023-cü il tarixinə olan konsolidə edilmiş maliyyə hesabatlarını açıqlayıb. Konsolidə edilmiş və təhlil olunmuş maliyyə hesabatı "ABB" ASC-nin maliyyə nəticələri ilə bərabər, onun törəmə şirkətlərinin - "ABB-Moskva" bankının, "ABB-GEO" QSC-nin, "Azərikard" MMC-nin, "Beynəlxalq Lizinq Şirkəti" MMC-nin və "ABB-İnvest” QSC-nin (birlikdə Qrup) maliyyə göstəricilərini də əks etdirir. 

Marja.az hesabatlara istinadən xəbər verir ki, ABB Qrupunun xalis mənfəəti 2023-cü ilin ilk 6 ayında (yanvar-iyun) ötən ilin eyni dövrü ilə müqayisədə 33 milyon 857 min manat və ya 26,2% artaraq 163 milyon 204 min manat təşkil edib. Bank 2022-ci ilin ilk 6 ayında 129 milyon 347 min manat xalis mənfəət əldə etmişdi.

GƏLİRLƏRİ ARTIB

ABB Qrupunun 2023-cü ilin ilk 6 ayında müştərilərə verilmiş kreditlərdən faiz gəlirləri 34 milyon 381 min manat və ya 19% artaraq 215 milyon 625 min manat, haqq və komissiya gəlirləri isə 9 milyon 370 min manat və ya 16,9% artaraq 64 milyon 884 min manat təşkil edib. 

ABB Qrupunun 2023-cü ilin ilk 6 ayında qiymətli kağızlara investisiyalardan gəliri 25 milyon 419 min manat və ya 2 dəfədən çox artaraq 49 milyon 606 min manat təşkil edib. Ötən ilin ilk 6 ayında Bankın  qiymətli kağızlara investisiyalardan gəliri 24 milyon 187 min manat olmuşdu. 

ABB Qrupunun 2023-cü ilin ilk 6 ayında pul və pul vəsaitləri ekvivalentlərindən gələn faiz gəlirləri 58 milyon 62 min manat artaraq 66 milyon 211 min manat təşkil edib.

BÖYÜKLÜYÜ 12 MİLYARD MANATDAN ÇOXDUR

ABB Qrupu 30 iyun 2023-cü il tarixində 12 milyard 402 milyon 467 min manat cəmi aktivlərə malik olub. Qrup ötən ilin sonuna 14 milyard 177 milyon 619 min manat cəmi aktivlərə malik idi. Aktivlərinin düşməsinin əsas səbəbi müştərilərin hesablarındakı vəsaitlərin 2 milyard 127 milyon 576 min manat azalaraq 9 milyard 124 milyon 445 min manata geriləməsi ilə əlaqədardır. 

KREDİT PORTFELİ 4 MİLYARD MANATI AŞIB

ABB Qrupu tərəfindən müştərilərə verilmiş kreditlər 30 iyun 2022 - 30 iyun 2023-cü il dövründə 636 milyon 182 min manat artaraq 4 milyard 37 milyon 240 min manata çatıb.

Qeyd edək ki, "ABB" ASC-nin nizamnamə kapitalının 96,6%-i dövlətə məxsusdur.