"Azərbaycan Sənaye Bankı" ASC 2023-cü ilin birinci yarısını (yanvar-iyun) 1 milyon 979 min manat xalis mənfəət ilə başa vurub. Bank ötən ilin eyni dövrünü 3 milyon 2 min manat xalis mənfəət ilə bağlamışdı. Beləliklə, "Azərbaycan Sənaye Bankı"nın xalis mənfəəti 2023-cü ilin birinci yarısında 2022-ci ilin birinci yarısı ilə müqayisədə 1 milyon 24 min manat və ya 34,1% azalıb.

Marja.az xəbər verir ki, 2023-cü ilin birinci yarısında "Azərbaycan Sənaye Bankı"nın cəmi əməliyyat gəlirləri (faiz və qeyri-faiz gəlirləri) 21 milyon 10 min manat, cəmi əməliyyat xərcləri (faiz və qeyri-faiz xərclər) 18 milyon 393 min manat, əməliyyat mənfəəti 2 milyon 613 min manat təşkil edib. Bank əməliyyat mənfəətindən 150 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırıb.

Müqayisə üçün qeyd edək ki, 2022-ci  ilin birinci yarısında "Azərbaycan Sənaye Bankı"nın əməliyyat mənfəəti 2 milyon 947 min manat təşkil etmişdi. Ehtiyatdan azad olmuş 816 min manat da mənfəətə əlavə edilmişdi.

 2023-cü ilin birinci yarısında 2022-ci ilin birinci yarısı ilə müqayisədə "Azərbaycan Sənaye Bankı"nın cəmi əməliyyat gəlirlərinin 4 milyon 599 min manat artmasına qarşılıq, cəmi əməliyyat xərcləri 4 milyon 981 min manat artıb. Xərclər gəlirlərdən daha çox artdığından Bankın mənfəəti azalıb.

"Azərbaycan Sənaye Bankı"nın cəmi aktivləri ötən ilin sonu ilə müqayisədə 5,4% azalaraq 30 iyun 2023-cü il tarixində 707 milyon 533 manat təşkil edib. Bankın kredit portfeli (müştərilərə verilmiş kreditlər) 0,2% azalaraq 241 milyon 169 manata düşüb.

"Azərbaycan Sənaye Bankı"nda depozitlər 2023-cü ilin birinci yarısında 2022-ci ilin sonu ilə müqayisədə 2,9% azalaraq 436 milyon  624 min manata geriləyib.

30 İyun 2023-cü il tarixində "Azərbaycan Sənaye Bankı" 106 milyon 565 min məcmu kapitala malik olub.