"Bank Avrasiya" ASC 2023-cü ilin birinci yarısını (yanvar-iyun) 2 milyon 273 manat xalis mənfəət ilə başa vurub. Bank ötən ilin eyni dövrünü 165 min manat xalis mənfəət ilə bağlamışdı. Beləliklə, 2023-cü ilin birinci yarısında 2022-ci ilin birinci yarısı ilə müqayisədə "Bank Avrasiya"nı xalis mənfəəti 2 milyon 108 min manat və ya 14 dəfəyə yaxın artıb. Artım faiz gəlirlərinin artmasından və mümkün zərərlər üçün yaradılan məqsədli ehtiyatlara daha az vəsait ayrılmasından qaynaqlanır.

Marja.az xəbər verir ki, "Bank Avrasiyanın faiz gəlirləri 2023-cü ilin birinci yarısında 2022-ci ilin birinci yarısı ilə müqayisədə 2 milyon 57 min manat və ya 34,5% artaraq 8 milyon 13 min manat, qeyri-faiz gəlirləri isə 239 min manat azalaraq 1 milyon 135 min manat təşkil edib.

2023-cü ilin birinci yarısında "Bank Avrasiya"nın cəmi əməliyyat gəlirləri (faiz və qeyri-faiz gəlirləri) 9 milyon 148 min manat, cəmi əməliyyat xərcəri (faiz və qeyri-faiz xərcləri) 5 milyon 371min manat, əməliyyat mənfəəti 3 milyon 778 min manat təşkil edib. Bank əməliyyat mənfəətindən 1 milyon 505 min manat mümkün zərərlər üçün yaradılan məqsədli ehtiyatlara ayırıb. 

Müqayisə üçün qeyd edək ki, 2022-ci ilin birinci yarısında "Bank Avrasiya"nın əməliyyat mənfəəti 2 milyon 433 min manat təşkil etmişdi və mümkün zərərlər üçün yaradılan məqsədli ehtiyatlara 2 milyon 267 min manat ayırmışdı.

"Bank Avrasiya"nın cəmi aktivləri ötən ilin sonu ilə müqayisədə 8% azalaraq 30 iyun 2023-cü il tarixində 206 milyon 272 manat təşkil edib. Azlama "Nağd pul vəsaitləri və ekvivalentləri, o cümlədən bloklaşdırılmış nağd vəsait" bəndi üzrədir.

"Bank Avrasiya"nın kredit portfeli (müştərilərə verilmiş kreditlər) ötən ilin sonu ilə müqayisədə 11 milyon 255 min manat və ya 9% artaraq 30 iyun 2023-cü il tarixində 136 milyon 607 min manata çatıb. O cümlədən, Bankın istehlak kreditləri portfeli 4 milyon 601 min manat artaraq 13 milyon 477 min manata, biznes kreditləri portfeli 1 milyon 27 min manat artaraq 67 milyon 927 min manata, ipoteka kreditləri portfeli isə 5 milyon 628 min manat artaraq 55 milyon 202 min manata yüksəlib. 

"Bank Avrasiya"da depozitlər 2023-cü ilin birinci yarısında 2022-ci ilin sonu ilə müqayisədə 5 milyon 695 min manat və ya  7,1% azalaraq 74 milyon 4 min manata düşüb.Bankda fiziki şəxslərin depozitləri artıb, hüquqi şəxslərin depozitləri isə azalıb. 

30 İyun 2023-cü il tarixində "Bank Avrasiya" 74 milyon 519 min manat məcmu kapitala malik olub.