"Yelo Bank" ASC 2023-cü ilin birinci yarısını (yanvar-iyun) 8 milyon 724 min manat xalis mənfəət ilə başa vurub. Bank ötən ilin eyni dövrünü 2 milyon 352 manat xalis mənfəət ilə bağlamışdı. Beləliklə, "Yelo Bankın xalis mənfəəti 2023-cü ilin birinci yarısında 2022-ci ilin birinci yarısı ilə müqayisədə 6 milyon 372 min manat və ya 3,7 dəfə (271%) artıb.

Marja.az xəbər verir ki,"Yelo Bank"ın faiz gəlirləri 2023-cü ilin birinci yarısında 2022-ci ilin birinci yarısı ilə müqayisədə 32,6% aratraq 52 milyon 524 min manata yüksəlib, qeyri-faiz gəlirləri isə 19,6% azalaraq 5 milyon 52 min manata düşüb. 

2023-cü ilin ilk 6 ayında "Yelo Bank"ın cəmi əməliyyat gəlirləri (faiz və qeyri-faiz gəlirləri) 57 milyon 576 min manat, cəmi əməliyyat xərcləri (faiz və qeyri-faiz xərcləri) 55 milyon 352 min manat, gəlirlər xərcləri üstələdiyindən əməliyyat mənfəəti 2 milyon 224 min manat təşkil edib. Mümkün zərərlər üçün yaradılan məqsədli ehtiyatlardan azad olan 6 milyon 500 min manat mənfəətə əlavə edilib və nəticədə mənfəət 8 milyon 724 min manata yüksəlib. 

Müqayisə üçün qeyd edək ki, 2022-ci ilin ilk 6 ayında "Yelo Bank"ın cəmi əməliyyat gəlirləri 45 milyon 886 min manat, cəmi əməliyyat xərcləri 44 milyon 856 min manat, əməliyyat mənfəəti 1 milyon 31 min manat təşkil etmişdi. Ehtiyatdan azad olan 1 milyon 321 min manatın hesabına mənfəət 2 milyon 352 min manata yüksəlmişdi. 

BANK BÖYÜYÜB

"Yelo Bank"ın cəmi aktivləri ötən ilin sonu ilə müqayisədə 3,1% və ya 25 milyon 403 min manat artaraq 30 iyun 2023-cü il tarixində 846 milyon 939 min manat təşkil edib. Bankın kredit portfeli (müştərilərə verilmiş kreditlər) isə 9,9% və ya 61 milyon 627 min manat artaraq 683 milyon 576 min manata çatıb.

"Yelo Bank"da depozitlər 2023-cü ilin birinci yarısında 2022-ci ilin sonu ilə müqayisədə 19 milyon 361 min manat və ya 3,4% aratraq 591 milyon 661 manata yüksəlib.  O cümlədən, fiziki şəxslərin depozitləri 12 miylon 783 min manat artaraq 448 milyon 647 min manata, hüquqi şəxslərin depozitləri isə 6 milyon 579 min manat artaraq 143 milyon 14 min manata qalxıb.

30 İyun 2023-cü il tarixində "Yelo Bank" 96 milyon 911 min manat məcmu kapitala malik olub.