Audi-nin yaydığı bir televiziya reklamı Çində narazılıq yaradıb.

"Marja" xəbər verir ki, Almaniyanın avtomobil istehsalçısı Audi-nin, qadınları ikinci əl avtomobilə bənzədən reklamı,  Çinin "Twitter"ı kimi tanınan "Weibo"da minlərlə qadının markaya reaksiya verməsinə səbəb olub və boykot çağırışları edilib.

 
2017-ci ilin ilk yarısında Çində satışları 15 faiz düşən Audi üçün bu heç də yaxşı bir hadisə deyil. Mübahisə yaradan reklam belədir:

 
-Audi-nin reklamı evlənmək isləyən cütlük ilə başlayır və nigah mərasimi zamanı bəyin anası "Bir dəqiqə gözləyin!" deyərək birdən-birə ortaya çıxır. Gəlini süzməyə başlayan qaynana, əvvəl gəlinin burnunu çəkir, sonra qulaqlarının arxasını nəzarət edir və sonda gənc qadının ağzını açıb dişlərinə baxır.

İşini bitirdikdən sonra yerinə qayıdan qayınana, cütlüyə dönərək "tamamdır" işarəsi edərək razılıq verir. Ancaq birdən qayınananın özü gəlinin sinəsini görür və onda məmnuniyyətsiz bir baxış yaranır. Səhnə dəyişdikdən sonra isə küçədə gedən bir Audi avtomobil ekranda görünür və səs ilə "Mühüm qərarlar diqqətli verilməlidir" mesajı verilir.

AUDİ ETİRAZLARDAN SONRA BƏYANAT VERİB
 

Çinli qadınlar başda olmaqla bir çox istehlakçı reklamı cinsiyyətçilik (bir cinsin digərindən üstün olduğunu müdafiə edən fikir və ideologiya) hesab edib və Audi-ni boykot çağırışları ediblər. Çinin aparıcı feminist aktivisti Li Maizi "Çox şirkət və Çinli rəsmilər də gender bərabərliyi anlayışını başa düşmür" deyərək reaksiya göstərib.

 
Şanxaylı redaktor Guo Zimeng isə "Çinin güclü qadınları potensial bir Audi müştərisidir və Audi isə alıcılarına belə mesaj göndərir"? deməklə kifayətlənib.

 
Weibo-da "Audi ikinci əl avadanlıq" adı ilə açılan mövzu 500 min dəfədən çox baxılıb. İnsanlar reklam üçün "iyrənc" şərhini yazıblar, bunu görən Audi Çindəki ofisi vasitəsilə rəsmi bəyanat vermək məcburiyyətində qalıb.

Audi açıqlamasında, reklamın Volkswagen markasının Çindəki biznes tərəfdaşlarının ikinci əl avtomobillər üzrə departamenti tərəfindən hazırlandığı bildirilib. Audi, "dərin bir peşmançılıq" hissi keçirdiyini qeyd etdiyi açıqlamasında, reklamın heç bir şəkildə şirkət dəyərləri ilə uyğun gəlmədiyini və təkcə Çində yayımlandığını və dərhal dayandırıldığını, əlaqədar şəxslər haqqında da istintaq başladığını bildirib.