Rabitəbank-ın İdarə Heyətinin sədri Aydın Hüseynov Səudiyyə Ərəbistanı Krallığının Ciddə şəhərində İslam İnkişaf Bankının (İİB) “Böhranlara Qarşı Mübarizə üçün Tərəfdaşlıqlar” mövzusunda 48-ci İllik Toplantısında iştirak edib.

Tədbir çərçivəsində İİB-in prezidenti Məhəmməd Süleyman Əl-Casir Bankla əməkdaşlığın yüksək qiymətləndirildiyini vurğulayaraq, həyata keçirilən birgə layihələrin ölkəmizdə iqtisadiyyatın, o cümlədən infrastrukturun inkişafı baxımından önəmini qeyd edib, əməkdaşlığın genişləndirilməsi, yaxın gələcəkdə həyata keçiriləcək layihələrdə Bankın böyük maraq göstərdiyini bildirib.

Toplantı çərçivəsində Rabitəbank ilə Ticarətin Maliyyələşdirilməsi üzrə Beynəlxalq İslam Korporasiyası (İTFC) arasında 10 mln ABŞ dolları məbləğində “Letter of Credit Confirmation Facility” (Akkreditiv) müqaviləsi imzalanmışdır.

Müqavilə bir tərəfdən “Rabitəbank” ASC-nin İdarə Heyətinin sədri Aydın Hüseynov, digər tərəfdən isə İslam İnkişaf Bankı Qrupuna daxil olan Ticarətin Maliyyələşdirilməsi üzrə Beynəlxalq İslam Korporasiyası (İTFC) rəhbəri və Özəl Sektorun İnkişafı üzrə İslam Korporasiyasının baş direktoru vəzifələrini icra edən Hani Salem Sonbol arasında bağlanıb.

Tərəflər Azərbaycanın ölkə iqtisadiyyatının inkişafı istiqamətində İTFC ilə əməkdaşlıq, eləcə də ticarətin maliyyələşdirilməsi, kiçik və orta biznesə dəstək imkanlarının genişləndirilməsi, Azərbaycanın ixrac potensialının gücləndirilməsində və İslam maliyyəsinin tətbiqində Korporasiyanın roluna diqqət ayıraraq, bu istiqamətdə atılacaq növbəti birgə addımlarında dair geniş müzakirələr aparıb. 

Qeyd edək ki, İslam İnkişaf Bankının (İİB) ənənəvi şəkildə keçirdiyi İllik görüşlər inkişaf məsələlərini və iqtisadi məqsədləri müzakirə etmək üçün beynəlxalq və regional təşkilatların müşahidəçiləri ilə yanaşı qrupun 57 üzv ölkəsindən nümayəndə heyətlərini bir araya gətirir. Görüşlərə adətən 2000-dən çox dövlət rəsmisi, yüksək səviyyəli dövlət xadimləri, beynəlxalq təşkilatların nümayəndələri və ekspertlər iştirak edir.

Builki görüşlər İİB qrupuna üzv ölkələrin üzləşdiyi problemləri müzakirə etmək və mövcud və potensial imkanları araşdırmaq üçün nəzərdə tutulub.