ABB ASC (Azərbaycan Beynəlxalq Bankı) 2023-cü ilin 1-ci rübü (yanvar-mart) üzrə maliyyə göstəricilərini açıqlayıb.

XALİS MƏNFƏƏTİ ƏHƏMİYYƏTLİ ARTIB

Marja.az xəbər verir ki, ABB 2023-cü ilin 1-ci rübünü 80,4 milyon manat xalis mənfəətlə başa vurub. Bank 2022-ci ilin 1-ci rübünü 39,2 milyon manat xalis mənfəətlə bağlamışdı. Beləliklə, ABB-nin xalis mənfəəti 2022-ci ilin 1-ci rübü ilə müqayisədə 2023-cü ilin 1-ci rübündə 105% (2 dəfədən çox) və ya 41,1 milyon manat artıb.

2023-cü ilin 1-ci rübündə ABB-nin cəmi əməliyyat gəlirləri isə (faiz və qeyri-faiz gəlirləri) 230,4 milyon manat təşkil edib. Bu da ötən ilin müvafiq dövrü ilə müqayisədə 54% və ya 80,7 milyon manat çoxdur.

ABB-nin əməliyyat mənfəəti isə 126,6 milyon manat olub (2022-ci ilin 1-ci rübündə 74.8 milyon manat təşkil etmişdi).

Hesabat dövrü ərzində ABB-nin mümkün zərərlər üçün yaradılan ehtiyatlara ayırdığı vəsait 20,7 milyon manat təşkil edib ki, bu da 2022-ci ilin 1-ci rübü ilə müqayisədə 20,2 % və ya 5,2 milyon manat azdır.

BANKIN KREDİT PORTFELİ BÖYÜYÜB

ABB-nin kredit portfeli (müştərilərə verilmiş kreditlər) 2022-ci ilin sonu ilə müqayisədə 1,8% və ya 64,2 milyon manat artaraq 3,6 milyard manata çatıb. 

MƏCMU KAPİTALI 1,5 MİLYARDA MANATA YAXINLAŞIB

ABB 1,5 milyard manat məcmu kapitala malikdir. İlk rüb ərzində ABB-nin I dərəcəli kapitalının adekvatlıq əmsalı 22.75%, məcmu kapitalının adekvatlıq əmsalı isə 23.52% təşkil edib. Qeyd etmək lazımdır ki, bu göstəricilər tənzimləyici orqanın müəyyən etdiyi normalardan (müvafiq olaraq sistem əhəmiyyətli banklar üçün minimum 6% və 12%) əhəmiyyətli şəkildə yüksəkdir. Bank 31 dekabr 2022-ci il tarixində 1,4 milyard manat məcmu kapitala malik idi. 

31 Mart 2023-cü il tarixində ABB-nin cəmi aktivləri 11,6 milyard manat, öhdəlikləri isə 9,9 milyard manat təşkil edib.

ABB-nin nizamnamə kapitalının 96,37%-i dövlətə məxsusdur.